Ўзбекистонда камбағаллик даражаси 2024 йил якуни билан 9 фоиздан пасаяди. Бу ҳақда Шавкат Мирзиёев тадбиркорликни ҳар томонлама қўллаб-қувватлаш бўйича 2024 йил якунлари ва 2025 йилга асосий режалар юзасидан видеоселектор йиғилишида маълум қилди.
Президентнинг қайд этишича, мураккаб геосиёсий шароитга қарамай, иқтисодиёт 6,3 фоизга ошиб, 111 миллиард доллардан кўпайди. Саноат, қишлоқ хўжалиги ва хизматлар соҳасига 38 миллиард доллар инвестисия кирди, экспорт 26 миллиард доллардан ошди.
Очиқ мулоқотда кўп тадбиркорлар ўзига ижтимоий масъулият олиб, эҳтиёжманд одамларни ишли қилишга тайёр эканлигини билдирган эди. Ўтган қисқа вақт ичида тадбиркорлар 387 минг камбағал оила аъзолари ва 40 минг ногиронлиги бор одамларни даромадли қилди.
“Аминманки, ўзаро ишончга асосланган ҳамкорлигимизни шу суръатда давом эттирсак, келгуси йилларда камбағаллик даражасини бемалол 6 фоизга туширамиз”, деди давлат раҳбари ва минглаб иш ўрни яратаётган, иқтисодиётнинг барқарор ўсишига муносиб ҳисса қўшаётган барча тадбиркорларга миннатдорлик билдирди.
Йиғилишда маълум қилинишича, Ўзбекистонда 5 мингдан зиёд ишчиси бор, йиллик даромади 1 триллион сўмдан ошган, камида 100 миллиард сўм солиқ тўлаётган 142 нафар “чемпион” тадбиркорлар пайдо бўлди. Бу корхоналар энг илғор технологиялар ва янгича бошқарувни жорий этган, ўзлари арзон ресурс олиб келаяпти, кредит ва солиқни ўз вақтида тўлаяпти, муддати ўтган қарзи йўқ.
Президент бошқа салоҳиятли тадбиркорларни ҳам қўллаб-қувватлаб, “чемпион” тадбиркорларни кўпайтириш кераклигини айтди. Бундай тадбиркорларга ер ва бинони тўғридан-тўғри бериш, давлат корхоналарини ҳам узоқ муддатга бошқарувга топшириш, ҳарбий саноат, дронлар ишлаб чиқариш, IT ва сунъий интеллектни кенг ривожлантиришда улар билан манфаатли ҳамкорликни йўлга қўйиш мумкинлиги қайд этилди.
“Тадбиркорларимиз қанча бой бўлса, халқимиз шунча фаровон яшайди, давлатимиз шунча қудратли бўлади. Тадбиркорнинг ютуғи — бу бутун халқимизнинг ютуғи”, деди презиэнт.
Шавкат Мирзиёев 2023 йилда бўлиб ўтган тадбиркорлар билан очиқ мулоқотда “Сизларни қўллаб-қувватлашга, янада қулай шароитлар яратиб беришга мен доим тайёрман”, деб айтганди.
Изоҳ (0)