Жаҳон банки ва айрим иқтисодчилар Ўзбекистонда иқтисодий тенгсизлик кучайиб бораётганидан хавотир билдирган. Иқтисодий тадқиқотлар ва ислоҳотлар маркази директори Обид Ҳакимов “Дарё” мухбири саволига жавобан, бундай фикрлар асоссизлигини айтди.
Тошкент шаҳрида 17–25 октябрь кунлари “Халқаро ҳамкорлик ташаббуслари ҳафталиги” ўтказилмоқда. Ҳафталик доирасида турли соҳаларга оид мулоқотлар ташкил этиляпти. 21 октябрь куни бўлиб ўтган учрашув Ўзбекистонда камбағалликни қисқартириш масаласига бағишланди.
Тадбирда Обид Ҳакимов чиқиш қилиб, мамлакатда камбағаллик улуши тобора камайиб бораётганини айтди. Якунда марказ раҳбари журналистлар билан суҳбатлашди. “Дарё” мухбирининг республикада молиявий тенгсизлик кескин кучайгани ҳақидаги саволига жавобан, мутахассис бундай фикрлар асоссизлигини айтди.
“Ўзбекистонда иқтисодий тенгсизлик кескин кучайди деган фикрларга қўшилмайман. Мамлакатдаги ва қўшни давлатлардаги тенгсизлик даражалари ўсишини қарасангиз бу фикрингиздан қайтасиз. Айрим қўшни давлатларда тенгсизлик кескин ошиб бормоқда. Ўзбекистонда кучли ижтимоий ҳимоя тизими бўлгани учун тенгсизлик меъёри ушлаб турилибди. Бу ҳар йили ўлчанади. Уй хўжаликлари бюджети сўровномаси доирасида тенгсизликни энг кўп ўлчайдиган Гини коэффициенти бўйича ўлчовларни амалга оширамиз.
Вилоятлар, ҳудудлар ёки бўлмаса, эркак ва аёллар кесимида бу масала таҳлил қилинади. Иқтисодчи Саймон Кузнес назариясига кўра, иқтисодий ривожланишнинг ўсиш даврида тенгсизлик кучаяди. Максимум нуқтага етгач, иқтисоднинг давомли ривожланиши бу тенгсизликни пасайтиради. Шунинг учун тенгсизлик Ўзбекистон давлат сиёсатининг таҳлилида ҳар доим инобатга олинган. Таҳлил натижалари солиқ ва бошқа сиёсатларда акс этади. Ўзбекистонда тенгсизлик кескин ўсмаган, нормал ҳолатда деб айта оламан”, деди марказ раҳбари.
Обид Ҳакимов журналистлар билан суҳбат давомида Ўзбекистонда камбағалликка қарши курашиш янги босқичга ўтишини айтди.
“Энди фақатгина монетар камбағалликка қарши курашиш эмас, кўп ўлчовли камбағалликка қарши курашиш бўйича давлат дастури эълон қилинди. Бу дастур асосида камбағал оилаларга 50 минг гектар ер тарқатилади. Бундай оилаларни билим даражасини ошириш, касбга ўқитиш, соғлиқни сақлаш ва уй шароитларини яхшилаш режалаштирилган. 2025 йилдан бошлаб кўп ўлчовли камбағалликка қарши курашиш дастурига ўтамиз”, дея маълум қилди мутахассис.
Тадбирдаги нутқида Обид Ҳакимов Ўзбекистонда камбағаллик даражаси йилига 3 фоиз камаяётганини айтиб ўтди. Таҳлилчининг таъкидлашича, 2020 йилда 23 фоиз аҳолининг даромадлари камбағаллик чегарасига етмаган. Бу кўрсаткич 2022 йилда 17 фоиз, 2024 йилга келиб 11 фоизга қисқарган.
Изоҳ (0)