Жорий йилнинг 5 июнь куни Тошкент шаҳрида “Ўзбекистонда иқтисодий ислоҳотлар ва Жаҳон савдо ташкилотига аъзо бўлиш жараёни” мавзусида халқаро анжуман бўлиб ўтди.
Тадбирда Ўзбекистон ҳукумати вакиллари, Жаҳон савдо ташкилоти (ЖСТ) раҳбари, Жаҳон банки ва Халқаро валюта жамғармаси расмийлари иштирок этди.
Тадбир аввалида Ўзбекистон президенти ёрдамчиси Саида Мирзиёева сўзга чиқиб, ЖСТга аъзо бўлиш савдо эркинлиги ва иқтисодиёт ўсишга катта туртки беришини айтди.
“Охирги 14 ойда Жаҳон савдо ташкилотига аъзо бўлиш бўйича учта ишчи гуруҳ йиғилиши ўтказилди. Ҳозиргача 14 та мамлакат билан икки томонлама музокаралар якунланди. Бу ташкилотга аъзо бўлиш жараёни осон эмас. Унга ҳеч бир мамлакат ҳақиқий ўзгаришлар қилмасдан киролмайди. Бир неча кун олдин президент Шавкат Мирзиёев қатор давлат корхоналарининг эксклюзив ҳуқуқларини бекор қилувчи фармонни имзоладилар. Ушбу узоқ муддатли муаммо кўплаб давлат корхоналарига бозор иқтисодиётига ўтиш имконини бермади ва пировардида хусусий сектор учун тенг имкониятларни чеклаб келди”, — деди президент ёрдамчиси.
Анжуманда Ўзбекистон 2026 йилгача ЖСТга аъзо бўлиш ниятида экани эслатиб ўтилди. Тадбирда Тошкентга ташриф буюрган ЖСТ бош директори Нгози Оконжо–Ивеала ҳам иштирок этиб, бундай йирик савдо ташкилотига аъзолик сиёсий иродасиз амалга ошмаслигини айтди.
“Ҳеч бир давлат ЖСТга аъзоликни сиёсий иродасиз амалга ошира олмаган. Мен Ўзбекистон ҳукуматида кучли сиёсий иродани кўриб турибман. Тошкентга ташрифим чоғида мамлакат қонунчилигини ЖСТ битимларига мувофиқлаштириш тўғрисидаги президент фармони эълон қилинди. Бу муҳим ҳужжатлардан ҳисобланади. Айтмоқчиманки, республиканинг бизнинг ташкилотга қўшилиш жараёни тўғри йўналишда кетмоқда”, — деди Нгози Оконжо–Ивеала.
Анжуманда бош вазири ўринбосари Жамшид Хўжаев ЖСТга қўшилиш йўлида қатор соҳаларда ўзгаришлар амалга оширилаётганини айтди.
“Ҳукумат учун ЖСТга аъзо бўлиш устувор масала. Ҳозирда божхона, интеллектуал мулкни ҳимоя қилиш соҳаларида ўзгаришлар қилинмоқда. Шунингдек, импорт лицензияси, ошкоралик, савдо режимини либераллаштириш, солиқлар ва бошқа йўналишларга доир 26 та ҳужжат таржима қилиниб, ўзимизнинг тизимга киритяпмиз. Давлат улуши бор корхоналарни хусусийлаштириш бўйича 4 та қонун ишлаб чиқмоқдамиз. Бундан ташқари, озиқ–овқат масаласида ҳам миллий қонунчиликни янгилаяпмиз”, — деди ҳукумат расмийси.
Конференцияда президент маслаҳатчиси Равшан Ғуломов 2030 йилгача Ўзбекистонда эришилиши кутилаётган натижалар ҳақида гапирди
“Келгуси 7 йил ичида мамлакатда давлат корхоналари сонини 6 баробарга қисқартирилиб, хусусий секторнинг иқтисодиётдаги улуши 85 фоизга етказиш режалаштирилган. 2030 йилгача республикада камбағаллик даражасини 7 фоизгача пасайтириш кўзда тутилган. Мазкур муддат мобайнида экспорт улушини 45 миллиард долларга етказиш мақсад қилинган. Бунда тайёр маҳсулот улуши камида 3 баробарга оширилади. 2030 йилгача мамлакатдаги қайта тикланувчи энергия манбалари жами ишлаб чиқарилган электр энергиясининг 40 фоизига етиши кутилмоқда”, —деди президент маслаҳатчиси.
-0JvpnuZF.jpg)
Анжуман доирасида панел сессиялари бўлиб ўтди. Ўзаро мулоқотларда миллий қонунчиликни ЖСТ битимларига уйғунлаштириш, эркин савдога йўл очиш, озиқ–овқат хавфсизлиги ва бошқа мавзулар муҳокама қилинди.
Изоҳ (0)