АҚШ F-16 қирувчи самолётларини Украинага шу йил охиригача топширишни режалаштирмоқда, деди Миллий хавфсизлик кенгашининг стратегик алоқалар бўйича координатори Жон Кирби. Унинг фикрича, Америка қирувчилари урушнинг боришини ўзгартирмайди.
“Улар (F-16 қирувчи самолётлари — “Дарё” изоҳи), эҳтимол, йил охиригача етказиб берилади. Аммо биргина улар вазиятни ўзгартира олмайди. Украиналикларга энг кераги — артиллерия, ўқ-дорилар, ҳаво ҳужумидан мудофаа тизимлари ва танклар”, — деди Кирби.
Унинг қўшимча қилишича, Вашингтон Киевга “мисли кўрилмаган даражада катта миқдорда ёрдам кўрсатган”.
Вильнюсдаги саммитда НАТО давлатлари украиналик учувчиларни тайёрлаш бўйича коалиция тузилганини эълон қилганди, унинг таркибига Дания, Нидерландия, Бельгия, Канада, Люксембург, Норвегия, Польша, Португалия, Руминия, Швеция ва Буюк Британия киради.
15 июль куни Politico нашри 11 давлатдан иборат коалиция машғулотларини бошлаш учун АҚШдан тасдиқ кутаётгани, Вашингтон расман рухсат бермагунча ишга киришолмаслигини хабар қилди.
Нашрнинг ёзишича, коалиция машғулотларни август ойида бошлашни кутмоқда, ўшанда Руминиядаги ўқув маркази ишга тушиши керак. Бироқ машғулотларнинг аниқ бошланиш санаси АҚШ Давлат департаменти томонидан белгиланади.
17 июль куни АҚШ президенти Жо Байден украиналик учувчиларни F-16 қирувчиларида учишга ўқитишни маъқуллади. Оқ уй улар бир неча ҳафта ичида машғулотларни бошлаши мумкинлигини билдирди.
Изоҳ (0)