АҚШ Буюк Британия билан биргаликда 12 январь куни Ямандаги “Ансор Аллоҳ” (ҳусийлар) объектларига зарбалар берди. Ҳусийлар уларни жавоб зарбалари беришларидан огоҳлантириб, мажбурий сафарбарлик эълон қилди. Хорижий давлатлар Ғазодаги урушнинг бутун Яқин Шарқда авж олиши ва кенгайиши хавфидан огоҳлантириб, ҳодисага ўз муносабатини билдирди.
Оқ уй баёнотига кўра, ҳусийларга қарши зарбалар Австралия, Баҳрайн, Канада ва Нидерландия кўмагида амалга оширилган. Ўз навбатида, Нидерландия бош вазири Марк Рютте АҚШ ва Британиянинг ҳаракатлари ўзини ҳимоя қилиш ҳуқуқини амалга оширишни англатишини таъкидлади.
“ АҚШ-Буюк Британия ҳаракати ўзини ҳимоя қилиш ҳуқуқига асосланган бўлиб, эркин навигацияни ҳимоя қилишга ва деескалацияга қаратилган. Денгиз мамлакати сифатида узоқ тарихга эга Нидерландига кемаларнинг эркин ҳаракатланиш ҳуқуқига катта аҳамият беради ва бу мақсадли операцияни қўллаб-қувватлайди”, — деди Нидерландия бош вазири.
Дания, Германия, Янги Зеландия ва Жанубий Кореяни ҳам ўз ичига олган халқаро коалиция қўшма баёнот чиқариб, “дунёнинг энг муҳим сув йўлларидан бирида одамлар ҳаётни ҳимоя қилиш ва эркин савдо оқимини таъминлаш” қатъиятини билдирди.
Саудия Арабистони Ташқи ишлар вазирлиги томонларни вазминлик кўрсатишга ва кейинги кескинлашувнинг олдини олишга чақирди, бироқ Қизил денгизда хавфсизлик ва кемаларнинг эркин ҳаракатланишини сақлаш муҳимлигини таъкидлади.
Хитой Ташқи ишлар вазирлиги матбуот котиби Мао Нин ҳам “можаро авж олишининг олдини олиш учун” барча томонларни хотиржамлик ва вазминликка чақирди.
Россия Ташқи ишлар вазирлиги расмий вакили Мария Захарова АҚШ ва Буюк Британиянинг Яманга берган зарбаларини БМТ Хавфсизлик Кенгаши резолюцияларини бузиш ва “халқаро ҳуқуқни мутлақо менсимаслик” деб атади. Москва ҳолат юзасидан 12 январь куни БМТ Хавфсизлик кенгашининг шошилинч йиғилишини ўтказишни сўраган.
Россия президенти матбуот котиби Дмитрий Песков БМТ Хавфсизлик кенгашида қабул қилинган, ҳусийлардан кемаларга ҳужумларни зудлик билан тўхтатишни талаб қилувчи резолюция зарба бериш ҳуқуқини бермаслигини айтди.
Туркия президенти Ражаб Тоййиб Эрдўғон АҚШ ва Буюк Британияни Ямандаги ҳусий жангарилари нишонларига номутаносиб куч ишлатганликда айблади.
“Қизил денгизни қон денгизига айлантиришга ҳаракат қилишмоқда, Исроил Фаластинда ҳам шундай қилмоқда”, — деди Эрдўғон.
Туркия раҳбарининг қўшимча қилишича, Анқара вазият ҳақидаги хабарларни кўплаб каналлар орқали оляпти. Унинг фикрича, “ҳусийлар АҚШ томонидан кўрилаётган чораларга муваффақиятли жавоб бермоқда”.
Эрон Ташқи ишлар вазирлиги матбуот котиби Носир Канани Чафий Вашингтон ва Лондонни Яман суверенитети ва ҳудудий яхлитлигини бузишда айблаб, минтақадаги вазиятни янада беқарорлаштиришдан огоҳлантирди.
Эрон томонидан қўллаб-қувватланган Ливаннинг “Ҳизбуллоҳ” ҳаракатининг айтишича, Ямандаги зарбалар “ АҚШ Ғазо ва минтақада сионист душман томонидан содир этилган фожиа ва қирғинларда тўлиқ шерик эканини яна бир бор тасдиқлайди”.
Изоҳ (0)