Дональд Трамп маъмурияти қарийб 2 миллион нафар давлат хизматчиларига давлат муассасалари штатларини қисқартириш нияти ҳақида маълум қилди ва хоҳловчиларга саккиз ой давомида иш ҳақи ҳамда бошқа имтиёзларни сақлаб қолган ҳолда ўз ихтиёри билан ишдан кетиш имкониятини тақдим этди.
Хабарда айтилишича, кўпчилик давлат муассасаларида штатлар қисқартирилиши эҳтимоли юқори, масофадан ишлаётган ходимлардан офислардаги иш ўринларига қайтиш талаб қилинади, хизматчиларнинг сезиларли қисмининг мақоми ўзгартирилади, бу эса уларни қисқартириш ёки ишдан бўшатиш жараёнини осонлаштиради.
Расмийларнинг ҳисоб-китобларига кўра, 5 фоиздан 10 фоизгача давлат хизматчилари ушбу таклифдан фойдаланишлари мумкин, бу эса 100 миллиард долларгача маблағни тежаш имконини беради. Мазкур таклиф ҳарбий хизматчилар ва миллий хавфсизлик билан боғлиқ тузилмалар ходимларига тааллуқли эмас.
New York Times газетаси Оқ уйнинг бу ушбу қарорини “федерал бюрократияга қарши тўғридан-тўғри ҳужум” деб баҳолади. Давлат хизматлари штатларини қисқартириш, жумладан, вазирликлар сонини камайтириш Дональд Трампнинг сайловолди ваъдаларидан бири эди.
Давлат хизматчиларини бирлаштирувчи касаба уюшмаси раҳбари Трамп маъмурияти ташаббусини кескин танқид қилди. У буни “федерал ҳукуматни тозалаш” деб атади ва мазкур ҳаракат меъёрида ишлайдиган ҳукумат хизматларига қарам бўлган америкаликлар учун салбий оқибатларга олиб келиши ҳақида огоҳлантирди.
Таҳлилчиларнинг таъкидлашича, Трамп маъмурияти ушбу ташаббусни амалга оширишда тўсиқларга дуч келиши мумкин, чунки федерал қонунлар қисқартирилаётган ходимларга Оқ уй таклиф қилганидан анча кам миқдорда тўловларни белгилайди. Бундан ташқари, ҳукумат давлат хизматчиларини қисқартириш ва ишдан бўшатиш имкониятини сезиларли даражада чеклайдиган меҳнат жамоа шартномалари билан ҳисоблашишга мажбур бўлади.
Изоҳ (0)