Польшага ракета келиб тушгани сабабли, АҚШ президенти Жо Байден G7 етакчиларининг шошилинч йиғилишини ўтказди, трансляция Оқ уй томонидан олиб борилди.
Ундан аввалроқ G7 етакчиларининг фавқулодда мажлиси ўтказилиши ҳақида Kyodo Япония ҳукуматидаги манбаларига таяниб хабар берганди. Агентлик маълумотларига кўра, шу муносабат билан Япония ва Буюк Британия бош вазирлари Фумио Кисида ва Риши Сунакнинг шу кунга режалаштирилган учрашуви кейинга қолдирилган.
«Катта еттилик»ка Япониядан ташқари Британия, Германия, Италия, Канада, АҚШ ва Франция киради. Шунингдек, саммитларда Евроиттифоқ вакиллари ҳам қатнашади.
Оқ уй сайтида АҚШ президенти Жо Байденнинг «жаҳон етакчилари» билан фавқулодда йиғилиши трансляцияси ҳақида эълон пайдо бўлди. Видеода учрашув бошлангани кўрсатилган, унда Америка президентидан ташқари, «катта еттилик» мамлакатлари етакчилари, Еврокомиссия раҳбари Урсула фон дер Ляйен ва Еврокенгаш раҳбари Шарл Мишел қатнашган. Трансляция 17 соания давом этган, бу вақт мобайнида сиёсатчилар суратга туширилган.
15 ноябрь куни Украина ҳудуди ёппасига ҳужумга учради, энергетика инфратузилмаси объектлари унинг нишонига айланди. Ҳукумат портлашлар ва электр энергиясидаги узилишлар ҳақида маълум қилди.
Шундан кейин Польшанинг Радио Зет радиоси Украина билан чегарадан 8 км узоқликда, Люблинск вилоятидаги Пшеводов қишлоғида жойлашган дон қуритиш иншоотида портлаш юз бериб, оқибатда икки киши ҳалок бўлганини маълум қилди. Ёнғин хизмати ҳодиса сабаби ҳозирча номаълумлигини қайд этди.
Польшада миллий хавфсизлик қўмитаси фавқулодда йиғилиш ўтказди, шундан кейин Варшава баъзи ҳарбий қисмларда жанговар шайликни оширди. Польша президенти Анжей Дуда 16 ноябрга Миллий хавфсизлик кенгаши йиғилишини ҳам белгилаган.
Reuters ёзишича, шу куниёқ Польша илтимоси билан НАТО элчилари фавқулодда учрашув ўтказади, у альянс уставининг томонлардан бирининг ҳудудий яхлитлиги, сиёсий мустақиллиги ёки хавфсизлиги таҳдид остида қолган тақдирда, маслаҳатлашувлар олиб бориш ҳақидаги 4-моддаси асосида ташкил этилади. Шунингдек, 16 ноябрга БМТ Хавфсизлик кенгашининг Украинадаги вазият бўйича мажлиси ҳам белгиланган.
Бир қатор мамлакатлар ҳодисада Россияни айблади. Россия Мудофаа вазирлиги портлашга алоқадорлигини рад этди ва Польша-Украина чегарасига яқин объектларга зарбалар берилмаганини маълум қилди. Мудофаа идораси бундай хабарларни «кескинликни кучайтиришга қаратилган провокация» деб атади. Пентагон Польшага келиб тушган ракеталар Россияники бўлганини ҳозирча тасдиқлай олмаслигини билдирди. ОАВларга кўра, воқеа жойидан топилган ракета бўлакларида ёзувлар йўқ.
Дуда Варшавада ракеталарнинг келиб чиқиши ҳақида аниқ маълумотлар йўқлигини айтди. «Кун бўйи Россиянинг Украинага қарши ракета ҳужуми давом этганини аниқ биламиз, бироқ айни пайтда бизда бу ракетани ким учиргани юзасидан аниқ далиллар йўқ», — деди у.
Бу орада Польша Ташқи ишалр вазирлиги Россия элчиси Сергей Андреевни чақиртирди ва ундан Украина ўққа тутилганидан кейин Польшанинг чегарага яқин қишлоғига «Россияда ишлаб чиқарилган снаряд келиб тушгани» юзасидан «зудлик билан батафсил тушунтиришлар» беришни талаб қилди.
Изоҳ (0)