Функсионал уй ва махфий бошпана: Марк Цукерберг қандай уйда яшайди?

Facebook асосчиси Марк Цукерберг доимий равишда оммавий ахборот воситаларининг диққат марказида. Ахборот империяси раҳбари сиёсатда ҳам фаол, у Threads платформасини ривожлантирди, бундан ташқари, спорт билан мунтазам шуғулланади. Хўш ахборот ва медиа олами етакчиси қаерда яшайди?

Спартан услубидаги бешта хона

Америкалик медиа магнат, интернет-тадбиркор ва хайриячи 1984 йилда Нью Йорк яқинидаги Уайт Плейнс шаҳрида туғилган. Унинг отаси стоматолог, онаси эса психиатр эди. Маркнинг ўзи дастлаб психолог бўлишни хоҳларди, лекин университетда ўқиётганда у ITга муккасидан кетган ва ўзини бутунлай дастурлашга бағишлаган.

Марк Цукерберг кўп йиллардан бери Калифорниянинг Пало Алто шаҳрида, ўз компаниясининг штаби яқинида яшайди. Миллиардер ҳар қандай кўчмас мулкни сотиб олишга қурби етиши мумкинлигига қарамай, унинг 7,6 миллион долларлик уйи жуда камтарона.

Facebook бош директорининг уйи 5 та ётоқхона ва 5 та ювиниш хонаси, меҳмонхона ва ошхонадан иборат. Стандарт бино компания штаб-квартирасидан атиги 10 дақиқалик масофада жойлашган. Америка ОАВ медиа магнати уйининг безаклари спарталикларга ўхшайди бунга сабаб Марк Цукерберг ҳашаматли интерерлар ва дизайн тарафдори эмас.

Цукербергнинг икки қаватли уйи деворлари оқ рангда. Бино атрофи дарахтлар билан ўралган. Ҳовли саранжом-саришта, майсалар ҳафсала билан ўрилган ва ҳовли рўпарасида бассейн жойлашган.

Қизиғи шундаки, уйни сотиб олганидан кўп ўтмай Марк Цукерберг қўшни бинолардан тўрттасини ҳам сотиб олди. Уларни илгари эгалик қилган оилаларга ижарага берди. Бу эса у қўшни уйларни мухлислар сотиб олишини истамаслиги билан изоҳланади.

Марк Цукерберг у ерда оиласи — рафиқаси ва уч фарзанди билан яшайди.

Функсионал ва ихчам

Миллиардер ўз уйи суратини тармоққа унчалик тез-тез жойлаштирмаса-да, барча хоналар ихчам, содда ва функсионал тарзда жиҳозланганини кўриш мумкин.

Уйда деразалар ва чироқлар кўп. Кенг ошхона зайтун рангидаги минималистик мебеллар ва керакли техникалар билан жиҳозланган.

Меҳмонхона деворлари оқ рангга бўялган. Токчалар ва камин ҳам қордек оппоқ. Ушбу нейтрал фонда табиий ёғочдан ясалган мебел ажралиб туради.

Масалан, хонанинг ўртасида қадимий сандиқ жойлашган бўлиб, Цукерберг ундан тумба шаклида фойдаланишни яхши кўради.

Кичкинагина журнал столи ва катта овқатланиш столи ҳам табиий ёғочдан ясалган.

Уйдаги ювиниш хоналари ҳам дид билан жиҳозланган.

Уларни безашда машҳур Каррар мармаридан фойдаланилган. Ушбу машҳур материалдан Микеланжело ўзининг ҳайкалларини ясашда ишлатган.

Бу ажойиб уйнинг яна бир хусусияти — очиқ ва ойнаванд айвонларнинг кўплигидир.

Уларнинг ҳар бирига қулай, юмшоқ мебел жойлаштирилган ва дам олиш учун ажойиб жойга айлантирилган.

Ҳовлидаги кенг шийпончада Цукерберг оиласи билан дам олишни ва дўстлари билан учрашишни яхши кўради.

Яқинда маълум бўлдики, Марк Цукерберг оролда турар жой бинолари, офислар, спорт инфратузилмаси ва ҳатто ерости бошпаналари бўлган махфий комплекс қурмоқда. Комплекснинг тахминий қиймати 270 миллион долларни ташкил этади.