Камбоджа бош вазири Хун Сен коронавирусга топширган тести мусбат натижа берди, у G20 саммити бўлиб ўтаётган Балидан ўз юртига қайтиб кетишга қарор қилди. Бу ҳақда Хун Сен Facebook’даги саҳифаси орқали маълум қилди, деб ёзади Bloomberg.
Камбоджа бош вазири 14 ноябрь куни тест топширган, вирусга чалинганини 15 ноябрь куни эрталаб индонезиялик шифокор ҳам тасдиқлаган. Хун Сен коронавирусни қачон ва қандай юқтириб олганини билмаслигини, аммо ўзини яхши ҳис қилаётганини айтди.
Хун Сен аввалроқ Камбоджада ўтказилган Шарқий Осиё саммитида Америка президенти Жо Байден билан учрашган эди. Улар дастлаб икки томонлама сессия ўтказган, сўнг АҚШ делегациясининг Жануби-Шарқий Осиё давлатлари ассоциацияси (АSEAН) билан учрашувида кўришган. Шундан кейин Байден ва Хун Сен узоқ вақт давом этган тантанали зиёфат чоғида ёнма-ён ўтирган, деб ёзади агентлик.
Бироқ Оқ уй хабарига кўра, 15 ноябрь куни эрталаб Байден коронавирусга топширган тест манфий натижа берган.
Шунингдек, Хун Сен Россия ташқи ишлар вазири Сергей Лавров, Индонезия президенти Жоко Видодо, Хитой Давлат кенгаши бош вазири Ли Кецян, БМТ бош котиби Антониу Гутерриш ва бошқа мамлакатлар етакчилари билан юзма-юз кўришган.
G20 саммити бошланди
Индонезиянинг Бали оролида бугун, 15 ноябрь куни G20 мамлакатлари етакчиларининг саммити бошланди.G20 таркибига Аргентина, Австралия, Бразилия, Буюк Британия, Германия, Ҳиндистон, Индонезия, Италия, Канада, Хитой, Мексика, Россия, Саудия Арабистони, АҚШ, Туркия, Франция, Жанубий Корея, Жанубий Африка, Япония ва Европа Иттифоқи киради.
G20 га аъзо бўлмаса-да, саммитга Украина президенти Владимир Зеленский ҳам таклиф қилинган. Дастлаб Зеленский агар G20 саммитида Россия президенти Владимир Путин иштирок этса, унда қатнашишдан бош тортишини маълум қилганди.
Кейинроқ Кремль иш жадвали ва Россияда бўлиш зарурати билан боғлиқ ҳолда Владимир Путин G20 да қатнашмаслигини маълум қилди. Bloomberg қайд этишича, Путин Украина билан можаро фонидан бошқа давлат етакчиларининг «совуқ нигоҳларидан қочиш» учун саммитда қатнашишдан бош тортган. Унинг ўрнига Россия делегациясига мамлакат ташқи ишлар вазири Сергей Лавров бошчилик қилмоқда.
Зеленский саммитда онлайн қатнашмоқда.
Балида яна кимларнинг мазаси қочди?
14 ноябрь куни Associated Press Россия ташқи ишлар вазири Сергей Лавров G20 саммити учун Балига етиб келганидан кейин касалхонага ётқизилгани ҳақида хабар берди. Агентликнинг Индонезия расмийлари орасидаги манбаларига кўра, россиялик дипломат Балида юрак хасталиги билан боғлиқ муолажа олган.Ўз навбатида, Бали губернатори Reuters агентлигига Лавровнинг соғ-саломат экани ва шифохонага тиббий кўрикдан ўтиш учун қисқа муддатга ташриф буюрганини айтган.
Россия ТИВ расмий вакили Мария Захарова Лавровнинг Балидаги касалхонага ётқизилгани ҳақидаги хабарларни «фейк» деб атади. Захарова Telegram’га вазирнинг видеосини ҳам жойлаштирди.
Шунингдек, Аргентина президенти Альберто Фернандес Балидаги G20 саммитида ўзини ёмон ҳис қилган.
Аргентина президенти шифокорининг баёнотида айтилишича, Фернандеснинг қон босими тушиб, боши айлана бошлаган. У кўрикдан ўтказилган.
Clarin нашрининг ёзишича, G20 саммитининг биринчи кунида Фернандес ўрнига Аргентинадан ташқи ишлар вазири Сантьяго Кафиеро вакиллик қилади.
Изоҳ (0)