Ғарб украиналик учувчиларни F-16 қирувчиларида ўқитиш режасини ҳалиям келишиб олмади — Politico

Ғарб давлатлари Украина ҳарбийларини Американинг F-16 қирувчи самолётларини бошқаришга ўргатиш масаласида ҳалигача келиша олмади. Машғулотлар Вашингтон зарур материалларни, масалан парвоз ва бошқарув бўйича қўлланмалар беришни расман тасдиқламагунча бошланмайди, деб ёзди Politico. Нашр хабарига кўра, АҚШ тегишли ҳужжатни ҳали имзоламаган.

Муҳокамадан хабардор уч нафар америкалик расмийнинг айтишича, машғулотлар режаси ҳали келишиб олинмаган. Таклифлар орасида украиналик учувчиларни машғулот учун Аризона штатининг Тусон шаҳрида жойлашган Ҳаво миллий гвардияси бўлинмасига юбориш бор. У ерда АҚШ чет эллик ҳамкорларни F-16 қирувчилари билан ишлашга ўргатади. Бироқ икки америкалик ва бир европалик амалдорнинг сўзларига кўра, бу ғоя унчалик маъқулланмаган.

Бошқа вариант эса украиналикларни тайёрлаш учун Европага америкалик учувчиларни юборишни назарда тутади.

“Биз ҳамкорларимиз ва иттифоқчиларимиз билан ушбу режани амалга оширишнинг энг амалий йўлини аниқлаш устида ишлаяпмиз”, — деди газетага АҚШ расмийларидан бири.

Украиналик учувчиларни ўқитиш қачон бошланади?

Вильнюсдаги саммитда НАТО давлатлари украиналик учувчиларни тайёрлаш бўйича коалиция тузилганини эълон қилганди, унинг таркибига Дания, Нидерландия, Бельгия, Канада, Люксембург, Норвегия, Польша, Португалия, Руминия, Швеция ва Буюк Британия киради.

15 июль куни Politico нашри 11 давлатдан иборат коалиция машғулотларини бошлаш учун АҚШдан тасдиқ кутаётгани, Вашингтон расман рухсат бермагунча ишга киришолмаслигини хабар қилди.

Нашрнинг ёзишича, коалиция машғулотларни август ойида бошлашни кутмоқда, ўшанда Руминиядаги ўқув маркази ишга тушиши керак. Бироқ машғулотларнинг аниқ бошланиш санаси АҚШ Давлат департаменти томонидан белгиланади.

17 июль куни АҚШ президенти Жо Байден украиналик учувчиларни F-16 қирувчиларида учишга ўқитишни маъқуллади. Оқ уй улар бир неча ҳафта ичида машғулотларни бошлаши мумкинлигини билдирди.

21 июль куни АҚШ Миллий хавфсизлик кенгашининг стратегик алоқалар бўйича координатори Жон Кирби Оқ уй F-16 қирувчи самолётларини Украинага шу йил охиригача топширишни режалаштираётгани ҳақида маълум қилди.