«Дарё» нашри 16 ноябрда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Польшага ракеталар келиб тушгани муносабати билан Байден G7 етакчиларининг фавқулодда мажлисини ўтказди
Польшага ракета келиб тушгани сабабли АҚШ президенти Жо Байден G7 етакчиларининг шошилинч йиғилишини ўтказди, трансляция Оқ уй томонидан олиб борилди. «Катта еттилик»ка Япониядан ташқари Британия, Германия, Италия, Канада, АҚШ ва Франция киради. Шунингдек, саммитларда Евроиттифоқ вакиллари ҳам қатнашади.
Оқ уй сайтида АҚШ президенти Жо Байденнинг «жаҳон етакчилари» билан фавқулодда йиғилиши трансляцияси ҳақида эълон пайдо бўлди. Видеода учрашув бошлангани кўрсатилган, унда Америка президентидан ташқари, «катта еттилик» мамлакатлари етакчилари, Еврокомиссия раҳбари Урсула фон дер Ляйен ва Еврокенгаш раҳбари Шарл Мишел қатнашган.
15 ноябрь куни Украина ҳудуди ёппасига ҳужумга учради, энергетика инфратузилмаси объектлари унинг нишонига айланди. Ҳукумат портлашлар ва электр энергиясидаги узилишлар ҳақида маълум қилди. Шундан кейин Польшанинг Зет радиоси Украина билан чегарадан 8 км узоқликда, Люблинск вилоятидаги Пшеводов қишлоғида жойлашган дон қуритиш иншоотида портлаш юз бериб, оқибатда икки киши ҳалок бўлганини маълум қилди.
Польшада миллий хавфсизлик қўмитаси фавқулодда йиғилиш ўтказди, шундан кейин Варшава баъзи ҳарбий қисмларда жанговар шайликни оширди. Бир қатор мамлакатлар ҳодисада Россияни айблади. Россия Мудофаа вазирлиги портлашга алоқадорлигини рад этди ва Польша-Украина чегарасига яқин объектларга зарбалар берилмаганини маълум қилди. Мудофаа идораси бундай хабарларни «кескинликни кучайтиришга қаратилган провокация» деб атаган.
Пентагон Польшага келиб тушган ракеталар Россияники бўлганини ҳозирча тасдиқлай олмаслигини билдирди. ОАВларга кўра, воқеа жойидан топилган ракета бўлакларида ёзувлар йўқ. Кейинроқ Associated Press томонидан Польшага тушган ракеталар Украина армиясининг Россия ҳужумларини қайтариш учун отган ракеталари бўлиши мумкинлиги маълум қилинди.
Украина кенг кўламда ракета ҳужумларига учраган пайти АҚШ Марказий разведка бошқармаси директори Киевда бўлган
АҚШ Марказий разведка бошқармаси (МРБ) директори Уильям Бернс Киевга ташриф буюрди ва Украина президенти Владимир Зеленский билан учрашди, деб ёзмоқда Washington Post.
Учрашувда Бернс «АҚШнинг Россия агрессиясига қарши курашда Украинага ёрдам бериш мажбуриятини тасдиқлаган». АҚШ МРБ раҳбари ташриф буюрган куни бутун Украина бўйлаб ҳаво тревогаси янгради, ҳаво ҳужумидан мудофаа тизимлари ишга тушди — Зеленский Киев ва Украина вилоятларига ўнлаб ракета учиб келгани ҳақида хабар берди, уларнинг аксарияти энергетика инфратузилмасига қаратилган.
Washington Post газетасига кўра, ракета ҳужумлари пайтида Бернс АҚШ элчихонасида бўлган. Нашр маълумотларига кўра, Россия Украина ҳудудига атайдан МРБ директорининг ташрифи вақтида зарба бергани ҳақида маълумот йўқ.
14 ноябрь, душанба куни Бернс Анқарада Россия Ташқи разведка хизмати раҳбари Сергей Наришкин билан учрашган эди. Учрашувда «Россия томонидан ядро қуроли қўлланилиши оқибатлари» муҳокама қилинган.
АҚШ Shahed дронларини ишлаб чиқарувчи Эрон компаниясига қарши санкциялар киритди. Россия бу қуроллардан Украина билан урушда фойдаланмоқдами?
АҚШ Молия вазирлиги Россия Украинага қарши урушда фойдаланаётган дронларни ишлаб чиқариш ва ташиш учун масъул Эрон компанияларига нисбатан санкциялар жорий қилди. Бу ҳақда АҚШ молия вазирлиги матбуот хизмати хабар берди.
Вазирлик маълумотларига кўра, дронларни ишлаб чиқариш билан шуғулланувчи Shahed Aviation Industries, шунингдек, уларни Россияга етказиб беришга алоқадор Success Aviation Services FZC ва Jet Global DMCC компаниялари АҚШ санкциялари остига тушган.
Бундан ташқари, 2 нафар жисмоний шахсга нисбатан ҳам санкциялар жорий этилган. Америка маълумотларига кўра, улар «Вагнер» хусусий ҳарбий компаниясини Эрон дронлари билан таъминлаган. Россия Украинадаги урушда Эронда ишлаб чиқарилган Shahed-131 ва Shahed-136 дронларидан фойдаланмоқда, Россия Қуролли кучлари уларнинг номини «Геран-1» ва «Геран-2» деб ўзгартириб олган. Россия расмийлари дронларнинг Эрондан олиб келинишини тан олмаяпти.Ноябрь ойи бошида Эрон ташқи ишлар вазири Ҳусайн Абдуллоҳиан Россияга бир қанча дронлар юборилганини тасдиқлаб, бу уруш бошланишидан бир неча ой олдин содир бўлганини айтди.
Ўзбекистонда электр таъминотидаги узилишлар ва аҳолига табиий газ етказиб бериш масалалари кўрилмоқда
Энергетика вазири ўринбосари Шерзод Хўжаев электр таъминотида бир соатдан ортиқ чеклов киритган ҳудуддаги масъулларга чора кўрилишини маълум қилди. Бу ҳақда у айни пайтда АОКАда бўлиб ўтаётган матбуот анжуманида айтди, дея хабар берди «Дарё» мухбири. Вазир ўринбосари бугун ОАВ вакилларига юзма-юз келиб, уларни ва жамоатчиликни қизиқтирган саволларга жавоб бермоқда.
Хатоларимиз бор, биз буни тан оламиз. Ишлаб чиқариш соҳаларида йўл қўйган камчиликларимиз ҳам бор. Шу боис биз аҳолидан тежамкор бўлишини сўраймиз, ўзимизни оқламоқчи ҳам эмасмиз.
Қайси ҳудудларда электр энергиясидаги узилишлар ярим ёки бир соатдан ошиб кетаётган бўлса, бунинг сабабларини ўрганамиз. Керак бўлса, камчиликларга йўл қўйган масъулларга чора кўрамиз», — дейди Энергетика вазирлиги ўринбосари Шерзод Хўжаев.
Мазкур тадбирда шунингдек, «Ўзбекнефтгаз» бошқарув раиси Меҳриддин Абдуллаев ҳам сўз олиб, GTL компаниясидаги ишлаб чиқариш 50 фоизга камайтирилиб, қолган газ аҳолига берилиши режалаштирилаётганини маълум қилди.
Вазири ўринбосари Шерзод Хўжаевнинг қўшимча қилишича, тез кунда чекловлар масаласи 80 фоизга ҳал этилади. «Бунинг учун табиий газ ва электр энергияси экспорти тўхтатилди. Ташқи импорт 20 фоизга оширилди. Бугунги кундаги узилишлар 8-10 соатлаб токни ўчиришга сабаб бўлолмайди», — дейди у.
Изоҳ (0)