Туркиянинг IC İçtaş İnşaat компанияси Ўзбекистондаги пулли автомобиль йўллари қурилишида иштирок этмоқчи. Бу ҳақда Иқтисодиёт ва молия вазирлиги матбуот хизмати хабар берди.
Маълум қилинишича, 15 январь куни компания бошқарув кенгаши аъзоси Реха Денемеч ҳамда бош вазир ўринбосари — иқтисодиёт ва молия вазири Жамшид Қўчқоров ўртасида учрашув бўлиб ўтди. Унда компаниянинг IC İçtaş İnşaat қурилиш бизнесини ривожлантириш бўйича бош директори Егемен Илкин ҳамда Ўзбекистон иқтисодиёт ва молия вазири ўринбосари Илҳомжон Умрзаков, транспорт вазири ўринбосари Илҳомжон Абдугафаров, Автомобиль йўллари қўмитаси раиси Жамшид Турсунов ва бошқа масъул вакиллар иштирок этди.
Унда томонлар ўртасида ДХШ дастурлари асосида транспорт инфратузилмасини такомиллаштириш, хусусан, автомобиль йўлларини қуриш ва модернизация қилиш масаласи кўриб чиқилди. Турк компаниясининг автомобиль йўллари, кўприклар ва аэропортлар қуриш йўналишидаги лойиҳалари юзасидан муҳокамалар бўлиб ўтди.
Суҳбат давомида Туркия компанияси янги Самарқанд—Бухоро тезюрар пулли автомобиль йўлини қуриш мақсадида Автомобиль йўллари қўмитаси билан англашув меморандуми имзолади.
Шунингдек, томонлар ДХШни ривожлантиришнинг асосий йўналишлари, унинг механизмлари ҳамда хорижий тажрибадан фойдаланиш борасида фикр алмашди. Музокаралар якунида белгиланган мақсадларга эришишда тизимли фаолият олиб боришга келишилди.
Самарқанд—Бухоро пулли автомобиль йўли ҳақида
Самарқанд ва Бухоро ўртасида пуллик автомобиль йўли қурилиши президентнинг 2024 йил 30 августдаги қарори билан белгиланган. Лойиҳа қиймати 1 миллиард долларга баҳоланган. Ушбу пулли йўл Самарқанд, Бухоро ва Навоий вилоятларидан ўтади. Жараёнларни 2027—2030 йилларда амалга ошириш режалаштирилган.
IC İçtaş İnşaat компанияси ҳақида
Компания 55 йиллик тажриба эга бўлиб, автомобиль йўллар, туннеллар, кўприклар ҳамда турли йирик иншоотларни нафақат Туркияда, балки хорижий давлатларда ДХШ асосида муваффақиятли барпо этган. Компания томонидан ДХШ асосида Истанбул шаҳрида умумий узунлиги 150 километр автомобиль йўли, денгиз устида 1,5 километр узунликдаги Явуз Султон Салим номли босфор кўприги қурилган, шунингдек, амалга оширилаётган йирик лойиҳа қаторига Вьетнамда қурилаётган янги аэропортни киритиш мумкин.
Изоҳ (0)