Ҳомиладорлик даврида аёллар доимгидан ҳам кўпроқ эҳтиёткор бўлишади, чунки уларнинг ҳар бир ҳаракати болага таъсир қилиши мумкин. Кўпгина бўлажак оналарни ҳомиладорлик пайтида маникюр ва педикюрни қилиш мумкинми ёки бу чақалоқ учун зарарлими, деган саволига Grazia нашри жавоб берди.
Гўзаллик салонига саёҳатлардан бутунлай воз кечиш қийин, чунки ушбу процедуралар ҳар доим аёлларнинг кайфиятини кўтаради ва уларга ўзларига бўлган ишончни оширишга ёрдам беради. Шифокорларнинг фикрига кўра, агар ҳомиладор аёллар бир нечта муҳим қоидаларга риоя қилса, маникюр ва педикюрдан хавфсиз тарзда фойдаланиши мумкин.
Аввало ходимлари материалларни тежамайдиган, тозалик ва вентиляцияни назорат қиладиган ҳамда кучли кимёвий моддалардан фойдаланмайдиган ишончли гўзаллик салонини топиш керак. Агар янги жойга борсангиз, барча асбоблар яхшилаб дезинфекцияланганлигига ишонч ҳосил қилинг. Уни қандай текшириш мумкин? Биринчидан, мутахассиснинг ўзи муҳрланган пакетни кўрсатиши ва мижознинг олдида очиши керак. Пакетнинг ўзида сана, стерилизация учун асбобларни юборган шахснинг исми бўлади.
Агар қўл ва оёқларда яра ёки кесилган жароҳатлар бўлса, маникюр ва педикюрдан воз кечиш тавсия этилади, чунки бундай вақтда инфекция юқиши хавфи мавжуд. Тери тузалгунча кутиш бошқа жиддий муаммоларнинг олдини олади. Тажрибали мутахассисни танланг, шунда бармоқлар атрофидаги терига зарар етказиш эҳтимоли камроқ бўлади.
Мутахассисга аввало ҳолатингиз ҳақида маълум қилинг ва процедура давомида фойдаланадиган маҳсулотлар хавфсиз ёки йўқлигини текширинг. Агар бирор шубҳа пайдо бўлса, унда ортиқча ташвишдан қутулиш учун салонга боришдан бош тортган маъқул.
Шуни ҳам ҳисобга олиш керакки, ҳомиладорлик пайтида аёлларнинг ҳидга бўлган сезгирлиги ортиб кетади, шунинг учун ҳатто оддий лак ёки уни тозалайдиган суюқликнинг ҳиди ҳам кўнгил айниши ва бош айланишига олиб келиши мумкин.
Изоҳ (0)