Невролог Екатерина Демяновская ўта тез суратда ўтаётган ҳаёт тарзи ва айни вақтнинг ўзида бир нечта вазифаларни бажаришга ҳаракат қилишга уриниш сурункали стрессга олиб келиши ҳақида огоҳлантирди.
Мутахассис фикрига кўра, стрессга қарши курашишда асосий элементлардан бири бу уйқу тартибини шакллантиришдир:
“Уйқу режимига амал қилиш тушкунлик ва стресс даражасини камайтириш учун муҳим қадамдир”, дейди эксперт.
Невролог яқин келажак ҳақидаги ташвишли хаёллардан фориғ бўлиш учун ҳар куни ухлашдан аввал эртанги кунни режалаштиришни тавсия қилди. Бу одат барча ишларни бошқариш ва хавотирни камайтиришга ёрдам беради.
“Эртанги кунни режалаштириш атиги 10-15 дақиқа вақтни олади, аммо стрессга учраш эҳтимолини камайтириш имконини беради”, дея тушунтирди невролог.
Стрессга қарши курашишнинг яна бир усули бу Cопинг стратегй (“бошқариш ва уддасидан чиқиш стратегияси”)дир. Бу стресс ёки қийин вазиятлар билан курашиш учун ишлатиладиган усуллар ва техникалар мажмуйи бўлиб, одамларнинг саломатлигини ҳимоя қилиш ва муаммоларга ижобий тарзда жавоб беришга ёрдам беради. Шу сабабли ижобий ҳиссиётлар учун вақт ажратиш: масалан, дўстлар билан учрашувлар, ҳобби, китоб ўқиш ёки сериал томоша қилиш каби енгил машғулотлар стрессга тушмаслик учун муҳим ҳисобланади.
Невролог тушкунлик ва асабийлик пайтида руҳий ҳолатни яхшилаш учун ёқимли хотираларни эслаб, “ижобий ҳиссиётлар банки”ни яратишни маслаҳат берди. Бу концепцияда “банк” сўзи метафора бўлиб, ҳаётдаги энг бахтли, тинч ёки қувончли дақиқаларини хотира сифатида жамлаш тушунилади. Бу хотиралар кейинчалик стрессли вазиятларда, қийинчиликларга дуч келганда ижобий ҳиссиётлар яратиш учун қайта ишлатилади.
Изоҳ (0)