Ҳар бир мамлакатнинг Янги йил билан боғлиқ турли қарашлари, одатлари ва нишонлаш усули бор. Шунга қарамасдан ҳаммани бир нарса: келаётган йилни омадли бўлишини исташ, режалар тузиш ва мўжизага ишониш бирлаштириб туради. Турли мамлакатларнинг бир-бирига ўхшамаган Янги йил суратлари ва уларнинг байрам билан боғлиқ ғаройиб одатларини эътиборингизга ҳавола қиламиз.
Хитойликлар Янги йилни февраль ойида нишонлайди
Хитойда Янги йил баҳор байрами ҳисобланади. Унинг бошланиши ой фазалари билан белгиланади ва ҳар йил 12 ҳайвондан бирининг номи билан аталади. Хитойликлар шу кунда қизил рангли либос кияди, кўча ва уйларни безатади. Мушакбозликнинг овози ёвуз руҳларни қўрқитиши, омад келтиришига ишонилади. Уйлар тозаланиб, бахт келиши учун жой очилади. Оила аъзолари эса хизмат сафари, ўқиш ёки бошқа иш билан бошқа мамлакатда бўлишига қарамай, кечки овқатга бир дастурхон атрофида тўпланади.
Японияда Янги йил деярли 1 ой давомида нишонланади
Японияда Янги йил Григорян календари асосида нишонланади, 25 декабрда бошланади ва деярли 1 ой давом этади. Японлар уйларини тўкин-сочинлик, хотиржамлик ва севги рамзи бўлган бамбук, олхўри дарахти шохлари билан безатади. Янги йил арафасида японлар ибодатхонага ташриф буюриб, Тангридан саломатлик ва бахт сўрайди. Янги йил оқшоми эса одамлар омад келтиради, деб ҳисобланган оқ ва пушти рангли, гуручдан тайёрланган кулчалар билан бўлишади.
Таиландда Янги йил 13 апрель куни нишонланади
Сонгкран деб номланадиган ушбу байрам қадимги ҳинд календарига кўра йил алмашинуви ва ёмғир мавсуми бошланишини билдиради. Бу кунда аҳоли роҳибларга байрамона таом улашади. Ғуборлардан тозаланиш, негативлардан қутулиш учун одамлар бир-бирига сув сепади.
Бирма аҳолиси ҳам Янги йилни апрелда нишонлайди, байрам санаси эса ҳукумат томонидан белгилаб берилади
Тахминан, 12 апрелдан 17 апрелгача бўлган кунларда нишонланадиган байрам Тинжаан деб аталади. Ушбу кун қанча қувонч ва шовқинга бой бўлса, шунча яхши. Бу билан ёғингарчилик мўл бўлишига ишонилади.
Ҳиндистонда бир йилда бир неча марта Янги йил нишонланади
Анъанавий Гуди-падва байрами март ойида нишонланади. Кўплаб штатларда Янги йил у ерда яшайдиган халқларнинг анъанавий календарига биноан бўлади. Улардан энг машҳури Бенгал Янги йили — Холи ҳисобланади. Қиш устидан баҳорнинг ғалабаси сифатида ой тўлганидан кейин икки ёки уч кун мобайнида нишонланадиган ушбу байрамни ҳиндлар эзгуликнинг ёвузлик устидан ғалабаси эканига ишонади. Анъанага кўра, бу кунда оммавий сайл ўтказилади ва ҳамма бир-бирига бўёқли сув ҳамда кукун сепади, бу ҳаракат баҳор келгани билан бир-бирини қутлаш, бахт-омад тилаш ҳисобланади.
Эфиопияда Янги йил 11-сентябрьда нишонланади
Эфиопияда Янги йил — Энкутаташ байрами нишонланади. Аҳоли ушбу куни эвкалипт ва қорақарағайдан улкан гулхан ёқади. Аддис-Абеба майдонига йиғилган халойиқ кулга айланган дарахтнинг қайси томонга қулашини кузатади ва айнан ўша тарафда ҳосил мўл бўлишига ишонилади.
Исроилда Янги йил кузда нишонланади
Рош ха-Шана деб номланадиган байрам сентябрь ёки октябрда нишонланади. Бу вақтда келаси йил “ширин” бўлиши учун олма ва асал ейилади.
Италияда эски буюмлар ташлаб юборилади
Италияликлар қанча кўп эски нарсалар ташлаб юборилса, келаси йил шунчалик бахтиёр бўлишига ишонади. 1 январь куни транспортлар ҳаракатланишдан тўхтайди, кўчалар ёрқин чироқ ва бошқа декорациялар билан безатилади, мушакбозлик бўлиб ўтади. Римда байрам оқшоми бахт келтиришига ишонилгани сабаб кўприкдан Тибр дарёсига сакраш анъанаси бор.
Грецияда Авлиё куни нишонланади
1 январь куни Грецияда нафақат Янги йил, балки авлиё Василий куни ҳам нишонланади. Василопита номли ёнғоқ ва мевали пирог пиширилади ва уни тайёрлаш жараёнида ичига танга солинади. Ейиш давомида кимнинг пирог бўлагидан танга чиқадиган бўлса, келаётган йилда ўша инсон энг бахтли бўлади.
Шотландияда 31 октябрдан 1 ноябрга ўтар кечаси Янги йилнинг бошланиши ҳисобланади
Олов, шам ва гулхан Самаян деб номланган байрамнинг рамзи ҳисобланади. Одамлар олов устидан сакрайди ҳамда оловнинг ёмонлик ва ёвузликлардан тозалашига ишонилади.
Буюк Британияда эски Янги йилни нишонлайдиганлар ҳам бор
Британияда Янги йил Григорян календари бўйича нишонланади, аммо Гваун водийсидаги кичик қишлоқ аҳолиси Янги йилни 1752 йилга қадар бўлгани сингари нишонлайди. Ушбу водийда 13 январь куни Янги йил кириб келади. Бу кунда болалар эски қўшиқларни айтиб, ширинлик ва совға сўраб қўшнилариникига чиқади.
Изоҳ (0)