Массачусетс технология институти олимлари салбий руҳдаги матн, фото ва видео маълумотлар руҳий саломатликка қандай таъсир қилиши бўйича бир қатор тадқиқотлар ўтказди. Унга кўра, негатив контент руҳиятида муаммолари бўлган фойдаланувчиларга янада кўпроқ зиён етказиши аниқланди.
Интернет фойдаланувчиларининг қандай турдаги маълумотларни излаши ва қайта ишлаши ҳақида маълумот берувчи тизимлардан фойдаланган ҳолда, тадқиқотчилар мингдан ортиқ инсонларни таҳлил қилишди. Уларнинг кўрсаткичи фойдаланилган ҳар бир веб-саҳифа учун алоҳида ҳисоблаб чиқилди ва ўзига хос ҳис-туйғулар: ғазаб, қўрқув, умид, ишонч, ажабланиш, қайғу, қувонч ва жирканиш каби ҳислар билан боғлиқ ҳолда кўриб чиқилди.
Биринчи тадқиқот иштирокчилари 5 кун давомида кунига 20 дақиқа интернетда вақт ўтказган бўлса, иккинчи тадқиқотда интернетдан фойдаланиш давомийлиги 30 дақиқага чўздирилди. Сўнг олимлар ҳар бир веб-саҳифадан маълум матнларни ажратиб олишди ва электрон алгоритм уларнинг ҳар бири учун салбий ёки ижобий баҳо берилганини ҳисоблаб чиқди. Иштирокчилар эса қайси сайтда қандай эмоцияни ҳис қилганини махсус анкеталарда қайд этиб борди.
Аниқланишича, интернет фойдаланувчиларнинг кайфияти қанчалик яхши бўлса, улар шунчалик ижобий ва руҳиятга зарар бермайдиган контентни танлаган. Ва аксинча, ёмон кайфиятдаги фойдаланувчилар кўпроқ салбий руҳдаги маълумотларни излаган.
Ушбу натижаларга асосланиб, тадқиқотчилар Digital Diet деб номланган ва юклаб олинадиган плуг инъни ишлаб чиқди. У Google’га берилган қидирув натижаларини учта тоифадаги рейтингга бўлади: ҳиссиётлар (ижобий ёки салбий), билим (маълумотни тушуна олиш даражаси) ва қўлланилиши (маълумотларнинг қанчалик фойдалилиги). Ушбу дастур маълумотни филтрлашда фойдаланувчиларга ёрдам беради.
“Руҳий саломатлигида муаммоси бор одамлар кўпроқ салбий ва қўрқув ҳиссини уйғотадиган контентни излашга мойил бўладилар, бу эса, уларнинг ҳолатларини янада ёмонлаштиради. Умид қиламизки, бу восита уларга интернетдан фойдаланишда асқатиши ҳамда салбий маълумотларга киришдан қайтаришига ёрдам беради”, дейди мутахассислар.
Изоҳ (0)