Туркия президенти Ражаб Тоййиб Эрдўғон яқин келажакда Сурия шимолида фаолият юритаётган, Анқара томонидан террорчи деб эътироф этилган Курдистон ишчи партияси (КИП) жангариларини қатъий йўқ қилиш истагини билдирди.
“Биз КИП-ХМК (КИПнинг Сурия тармоғи — “Халқ мудофаа кучлари”) террорчилик ташкилотига ҳеч қандай тоқат қилмаймиз. Агар Сурия ҳудудининг учдан бир қисмини босиб олган ХМК гуруҳ раҳбари Абдуллоҳ Ўжалоннинг қуролни ташлаш ҳақидаги чақириғига қулоқ солмаса, яқин орада бу масалани тубдан ҳал қилиш учун қатъий чоралар кўрамиз”, деди Эрдўғон.
Эрдўғоннинг Туркиядаги ҳукмрон коалициядаги ҳамкори, Миллатчи ҳаракат партияси (МHP) етакчиси Давлат Баҳчали аввалроқ курд масаласини ҳал қилиш бўйича таклиф билан чиқиб, умрбод қамоқ жазосини ўтаётган КИП раҳбари Ўжалонни ўз тарафдорларига таслим бўлиш ташаббуси билан чиқишга даъват этганди.
Курд тарафдори ДЕМ партияси вакиллари 2024 йил охирида Мармара денгизидаги Имрали оролидаги қамоқхонада Ўжалан билан музокара ўтказган эди. Туркия ҳукуматини қўллаб-қувватловчи ОАВларнинг хабар беришича, у февраль ойининг ўрталаригача КИПга Туркияга қарши қуролли қаршиликни тўхтатиш учун мурожаат қилиши мумкин.
Туркия етакчиси аввал ҳам халқаро ўйинчиларни Суриядан “қўлларини тортишга” чақириб, Анқара мамлакатда террористик гуруҳларнинг фаолиятига чек қўйиш учун етарли салоҳият ва имкониятларга эга эканини айтган эди.
Президент КИП билан боғлиқ террорчи гуруҳларни қуролсизланишга чақирган. У, шунингдек, агар улар буни рад этса, Анқара терроризмни йўқ қилиш йўлини топишига ишонтирган.
Hurriyet нашри ҳам Анқара, агар курд террорчилари қуролларини ташламаса, Сурия билан биргаликдаги операцияни бошлаши мумкинлиги ҳақида хабар берган.
Туркия ташқи ишлар вазири Ҳакан Фидан агар ҳукумат томонидан қўйилган шартлар бажарилмаса, мамлакат Сурия ҳудудида фаолият кўрсатаётган курд қуролли гуруҳларига қарши ҳарбий операция ўтказишга мажбур бўлиши ҳақида таъкидлаган.
“Агар Курдистон ишчилар партияси (КИП) террорчилик ташкилотига нисбатан кутилаётган ишлар бажарилмаса, зарур чоралар кўрилади. Зарур чора эса ҳарбий операциядир”, деган вазир.
Изоҳ (0)