Туркия армияси Ироқ шимолидаги Курдистон ишчилар партияси (КИП) нишонларига ҳаводан зарба берди. Таъкидланишича, 20 та объект йўқ қилинган.
“Ироқ шимолида Метина, Ҳакурк, Қандил ва Гара ҳудудларидаги террорчилар нишонларига авиазарбалар берилди”, — дейилади Туркия Мудофаа вазирлигининг Twitter (Х) ижтимоий тармоғидаги баёнотида.
Туркияда фаолияти тақиқланган КИП Анқара марказида, Ички ишлар вазирлиги биноси яқинида содир этилган теракт учун жавобгарликни ўз зиммасига олганди. КИП баёноти ташкилотга яқин АНФ агентлигининг интернет саҳифасида эълон қилинди.
КИП вакилларининг таъкидлашича, “акция” давомида партия аъзолари Ички ишлар вазирлиги биносига кириб, бир қўриқчини ўлдирган. Вазирлик эса ҳодисада икки полициячи енгил жароҳат олгани ва улар орасида ўлим ҳолатлари қайд этилмагани ҳақида баёнот берган.
Анқара марказидаги Қизилай майдонида 1-октябрь куни эрталаб ИИВ биноси ёнида портлаш содир бўлди. Оқибатда террорчилардан бири ҳалок бўлди, иккинчиси “зарарсизлантирилди”.
Маълумот учун Курдистон ишчилар партияси Туркиядаги курдлар ҳуқуқлари ва курд мухториятини яратиш учун курашмоқда. КИП 1978 йилда тузилган. Ташкилот Туркия, АҚШ ва Европа Иттифоқида террорчи сифатида тан олинган.
Изоҳ (0)