Туркия ўз чегаралари яқинида аксилтеррор операциясини ўтказиш учун рухсат сўрамаслигини маълум қилди. Бу ҳақда Туркия Миллий мудофаа вазири Яшар Гулер ахборотига таяниб, “РИА Новости” хабар берди.
Туркия армияси Ироқ шимолида мамлакатда тақиқланган Курдистон ишчилар партияси (КИП) жангариларига қарши кенг кўламли қуруқликдаги ҳарбий операция ўтказишни режалаштирмоқда. Hurriyet нашрининг аввалроқ хабар беришича, Бағдод маъмурияти билан мазкур масалада келишувга эришилган.
Мамлакатимиз хавфсизлиги ҳақида гап кетганда, биз ҳеч кимдан ҳеч нарса сўрамаймиз ва керакли ишни қиламиз. Туркия буюк давлат эканини ҳеч ким унутмаслиги керак. Биз ҳеч кимнинг буйруғига бўйсунмаганмиз ва бўйсунмаймиз ҳам, — дея таъкидлаган Гулер Hurriyet’га берган интервьюсида.
Туркия президенти Ражаб Тоййиб Эрдўғон ёзда Ироқ билан чегара хавфсизлиги масаласини ҳал қилишни кутаётганини айтган. Унинг сўзларига кўра, Туркия Сурияда 30-40 километр чуқурликда хавфсизлик коридорини яратиш ниятида.
КИП билан қуролли можаро Туркияда 1984 йилда бошланиб, 2015 йилда янгиланган. Ироқ шимолида КИП базалари мавжуд бўлиб, Туркия армияси уларга қарши ҳаво ва қуруқлик амалиётларини ўтказмоқда.
Изоҳ (0)