Агар Туркия томонидан қўйилган шартлар бажарилмаса, мамлакат Сурия ҳудудида фаолият кўрсатаётган курд қуролли гуруҳларига қарши ҳарбий операция ўтказишга мажбур бўлади. Бу ҳақда Туркия ташқи ишлар вазири Ҳакан Фидан маълум қилди.
“Агар Курдистон ишчилар партияси (КИП) террорчилик ташкилотига нисбатан кутилаётган ишлар бажарилмаса, зарур чоралар кўрилади. Зарур чора эса ҳарбий операциядир”, деди вазир.
У талаблар орасида Сурия ҳудудидан хорижлик террорчиларни чиқариб юбориш, ҳаракат аъзоларининг қолганини эса “қуролларини топшириб, янги маъмурият билан ҳамкорлик қилиш” кабиларни санаб ўтди.
6 январь куни Туркия президенти Ражаб Тойиб Эрдўғон Суриянинг парчаланиши хавфи туғилган тақдирда “зарур чоралар” кўришга ваъда берган эди.
Сурия расмийлари ҳам курд жангариларидан қуролларини ташлашни талаб қилди
Hurriyet нашри Суриянинг янги ҳукумати мамлакат шимолида жойлашган Курдистон ишчилар партиясининг (КИП) жангариларидан қуролларини ташлашни талаб қилгани ҳақида хабар берган эди.
Дамашқда КИПнинг Суриядаги бўлими ҳисобланмиш — Халқ мудофаа кучлари ва Суриянинг янги ҳукумати вакиллари ўртасида учрашув бўлиб ўтган.
Маълум бўлишича, курд томони қуролларни ташлаш талаби эвазига Суриянинг янги армияси таркибида камида битта армия корпуси ёки дивизиясини ташкил этиш, шунингдек, мамлакат шимолидаги нефть конларини тенг тақсимлашни таклиф қилган.
Бироқ янги ҳокимият КИПга қуролларини сўзсиз ташлаб қўйиш шартини қўйиб, бу масалани ҳатто муҳокама қилмади, дейилади хабарда.
Суриядаги вазият
Ноябрь ойи охирида қуролли исёнчилар Сурия шимолий қисмига юришни бошлади. Улар Идлиб вилоятини, мамлакатдаги аҳоли сони бўйича иккинчи ўринда турувчи Ҳалаб шаҳрини, Хама ва Хомс вилоятлари ҳудудларининг бир қисмини ўз назоратига олди. Шундан сўнг Дамашққа кирди. Президент Башар Асад оиласи билан мамлакатни тарк этди.
Россия Ташқи ишлар вазирлиги Башар Асад исёнчилар билан келишувга эришиб, истеъфога чиқишга рози бўлгани, шундан кейин Сурияни тарк этгани ҳақида маълумот берди. Исёнчилар Асадни қўлга олишда ёрдам берадиган маълумот учун 10 миллион доллар ваъда қилган.
Сиёсатчи мамлакатни тарк этганидан кейин исёнчилар Асад қароргоҳига бостириб кирган, одамлар буюмларни талон-торож қилган. Қароргоҳдаги гаражда BMW, Audi, Ferrari, Lamborghini Diablo каби 50 га яқин ҳашаматли ва қимматбаҳо автомобиллар аниқланган. Кечроқ Кремлдаги манбалар Суриядан қочган президент оиласи билан Москвага келгани, Путин уларга бошпана берганини маълум қилди.
10 декабрь куни Идлиб шаҳрида исёнчиларга раҳбарлик қилган Муҳаммад ал-Башир ўзини Суриянинг ўтиш даври ҳукумати раҳбари этиб тайинлади. У фуқароларга қарата қилган телевидение мурожаатида бу лавозимни камида 2025 йил 1 мартгача эгаллаб туришини маълум қилди.
Изоҳ (0)