Туркия ҳуқуқ-тартибот идоралари ходимлари мамлакатда террорчи деб топилган Курдистон ишчилар партияси(КИП)га алоқадаликда гумон қилинган 90 га яқин кишини қўлга олди, деб хабар бермоқда Anadolu агентлиги.

Туркиянинг 18 вилоятида, жумладан, Истанбул ва Анталияда аксилтеррор амалиётлари ўтказилди.

Агентликнинг қайд этишича, гумондорлар Ироқ, Сурия ва Туркиядаги разведка хизматларининг разведка фаолияти туфайли аниқланган.

1-октябр куни Туркия Ички ишлар вазирлигининг Анқарадаги бош хавфсизлик бошқармаси яқинида теракт содир этилганди. Икки террорчи кичик фургонда бино яқинидаги дарвоза олдида тўхтаган. Улардан бири портловчи қурилмани ишга тушириб, ҳалок бўлган. Иккинчиси эса зарарсизлантирилган. 

Ҳужум учун жавобгарликни КИП аъзолари ўз зиммасига олди. Бунга жавобан Туркия армияси Ироқ шимолидаги КИП нишонларига ҳаводан зарба берди. Таъкидланишича, 20 та объект йўқ қилинган.