Туркия НАТОнинг Швеция ва Финляндия билан уларнинг альянсга киришига қарши эътирозлари бўйича уч томонлама музокаралар ўтказиш таклифини рад этди, деб ёзади «РБК».
Financial Times ўз манбаларига таяниб хабар беришича, НАТО воситачилигидаги музокаралар 15 июнга режалаштирилган эди, бироқ улар ўтказилмади.
Анқара музокараларга розилик беришидан аввал Хельсинки ва Стокгольмдан Курдистон ишчилар партияси (КИП)нинг фаолияти юзасидан хавотирлар бўйича «муайян таклифлар»ни талаб қилмоқда. Туркия президенти Ражаб Тоййиб Эрдўғон 15 июнь, чоршанба куни Швеция ва Финляндия террорчиликка қарши курашда «аниқ ва қатъий ҳаракатлар»ни амалга оширмагунича, уларнинг альянсга аъзолигига ўз муносабатини ўзгартирмаслигини яна маълум қилди. Туркия етакчиси аввал ҳам Швеция ва Финляндияни НАТО билан альянсга қўшилиш бўйича музокараларга вақтини сарфламасликка чақирган эди. Туркиянинг талаблари ўзгаргани йўқ ва гаплашадиган ҳеч нарса йўқ, деган эди у.
Альянс бош котиби Йенс Столтенберг 13 июнь куни Швецияга ташрифи чоғида Туркия билан муносабатларни йўлга қўйиш ҳамда Швеция ва Финляндиянинг аризалари бўйича тезроқ прогрессга эришиш учун барча томонлар билан яқин мулоқот давом эттирилаётганини айтганди. Столтенберг Стокгольмнинг муаммони, хусусан, террорчиликка қарши курашга нисбатан қонунчиликни ўзгартириш йўли билан ҳал қилишга тайёрлигини маъқуллади. У Туркиянинг хавотирларини ўринли деб атади. Бош котиб масалани оқилона муддатларда ҳал қилиш мумкинлигига ишонч билдирди. «Менинг мақсадим шундан иборатки, Финляндия ва Швеция иложи борича тезроқ альянсга аъзо бўлиши керак», — деди Столтенберг.
Финляндия ва Швеция 18 май куни НАТОга кириш учун ариза топширганди. Бироқ Туркия ҳозирда ушбу аризаларни кўриб чиқишга тўсқинлик қилмоқда. Анқаранинг Скандинавия давлатларига қарши бир қанча даъволари бор: хусусан, Туркия Швеция ва Финляндияни Туркияда террорчи деб топилган курд гуруҳларини қўллаб-қувватлашда айблайди.
Изоҳ (0)