Туркия ташқи ишлар вазири Мавлут Чавушўғлининг матбуот анжуманида айтишича, Швеция ва Финляндия Анқара томонидан НАТОга аъзо бўлиш бўйича қўйилган талабларни ҳалигача бажармаган. Бу ҳақда Туркиянинг Anadolu агентлигига таяниб, «РБК» хабар бермоқда.
Вазир Анқаранинг Хелсинки ва Стокгольм билан тузган келишувини эслатди. Унга кўра, улар террорчи деб ҳисоблаган Курдистон ишчилар партияси (КИП) аъзоларини Туркияга экстрадиция қилишлари, унинг тузилмаларига алоқадор барча ташкилотларни ёпишлари ва Анқарага бу хусусда кафолат беришлари керак.
Мамлакат, ўз навбатида, бу давлатларнинг НАТОга киришига тўсқинлик қилмаслик мажбуриятини олди. Бироқ Туркия томони Швеция ва Финляндиянинг бу йўналишда ҳеч қандай қадам ташлаганини ҳалигача кўрмади, деган у.
Давлатнинг НАТОга аъзо бўлиши учун уни ташкилотнинг бошқа барча фаол аъзолари маъқуллаши керак. Бироқ Туркия, Хелсинки ва Стокгольм талабларини бажармагунча бунга йўл қўймаслигини билдирди.
Июнь ойи охирида Туркия президенти Ражаб Тоййиб Эрдўғон финляндиялик ҳамкасби Саули Ниинистё ва Швеция бош вазири Магдалена Андерссон билан учрашиб, бу борада улар билан келишиб олган. Ўшанда президент улар Туркиянинг ваъдаларини бажарганидан кейингина, мамлакатлар аризаларини ратификация қилишига аниқлик киритган эди.
Мавзуга доир: Эрдўғон Швеция ва Финляндиядан НАТОга кириш учун ўз қонунларини ўзгартиришни талаб қилди
Изоҳ (0)