Швеция Қуръоннинг ёқилишига қарши курашмас экан, Туркия унинг НАТОга аъзо бўлиш ташаббусини қўллаб-қувватламайди. Бу ҳақда Туркия президенти Ражаб Тоййиб Эрдўғон маълум қилди, деб ёзмоқда Reuters.
“Швеция бу ҳақда ўйламаса ҳам бўлади! Муқаддас китобимиз Қуръонни ёқиш ва йиртиб ташлашга йўл қўйишда давом этаркан, унинг НАТОга аъзо бўлиш учун берган аризасини маъқуллай олмаймиз”, — деди Эрдўғон 1 февраль куни ҳукмрон Адолат ва тараққиёт партиясининг парламентдаги фракциясига қилган ҳафталик мурожаатида.
Hurriyet Daily News хабарига кўра, Туркия етакчиси Швеция билан биргаликда алянсга кириш учун ариза берган Финляндиянинг НАТОга кириш ташаббусини юқори баҳолаган. “Биз Финляндия бўйича ижобий позициядамиз, лекин Швеция борасида эмас”, — деб унинг сўзларини келтиради нашр.
21 январь куни Туркиянинг Стокгольмдаги элчихонаси ёнида норозилик митинги бўлиб ўтганди: акция иштирокчилари Туркияда тақиқланган Курдистон ишчилар партиясини (КИП) қўллаб-қувватлаган ва Швециянинг НАТОга киришига қарши чиққан. Намойиш ташкилотчиси, ўта ўнгчи сиёсатчи, Страм Курс партияси раҳбари Расмус Палудан митингда исломни қораловчи нутқ сўзлаган, сўнгра юмшоқ муқовали Қуръонни ёқиб юборган.
Швеция полицияси митингга сўз эркинлиги тўғрисидаги қонунларга мувофиқ рухсат берилганини тушунтирди.
Ўз навбатида, Швеция ҳукумати аъзолари ҳам Қуръоннинг ёқилишини қоралаб чиқди. Туркия президенти Ражаб Тоййиб Эрдўғон воқеага муносабат билдириб, Швеция энди НАТОга аъзоликда қўллаб-қувватланмаслигини айтди.
23 январь куни Нидерландияда “Ватанпарвар европаликлар Ғарбнинг исломлашувига қарши” (PEGIDА) ҳаракати етакчиси Эдвин Вагенсвелд Гаагадаги Нидерландия Вакиллар палатаси биноси олдида Қуръон китобини омма олдида йиртиб, ёқиб юборди. У намойиш Расмус Палуданни қўллаб-қувватлаш учун ўтказилганини маълум қилди.
27 январь куни Расмус Палудан Копенгагендаги масжид олдида ҳам муқаддас китобни ёқиб юборди. Ҳолат юзасидан Дания элчиси Туркия ТИВга чақиртирилди.