Нидерландияда фаол Швециядаги акцияни қўллаб-қувватлаш учун Қуръонни йиртиб ташлади

Нидерландияда “Ватанпарвар европаликлар Ғарбнинг исломлашувига қарши” (PEGIDA) ҳаракати етакчиси Эдвин Вагенсвелд 23 январь куни Гаагадаги Нидерландия Вакиллар палатаси биноси олдида Қуръон китобини омма олдида йиртиб, ёқиб юборди. Бу ҳақда АDR News хабар бермоқда.

Акция 21 январь куни Туркиянинг Стокгольмдаги элчихонаси олдида Қуръонни ёқиб юборганидан кейин жамоатчилик танқидига учраган даниялик сиёсатчи Расмус Палуданни қўллаб-қувватлаш учун ўтказилган. 

Турк ОАВларининг хабар беришича, Вагенсвелд аввал ҳам икки марта худди шундай қилган ва ҳар сафар ҳибсга олинган, аммо бу сафар полиция унинг акциясига аралашмаган.

21 январь куни Туркиянинг Стокгольмдаги элчихонаси ёнида норозилик митинги бўлиб ўтганди: акция иштирокчилари Туркияда тақиқланган Курдистон ишчилар партиясини (КИП) қўллаб-қувватлаган ва Швециянинг НАТОга киришига қарши чиққан. Намойиш ташкилотчиси, ўта ўнгчи сиёсатчи, Страм Курс партияси раҳбари Расмус Палудан митингда исломни қораловчи нутқ сўзлаган, сўнгра юмшоқ муқовали Қуръонни ёқиб юборган.

Швеция полицияси митингга сўз эркинлиги тўғрисидаги қонунларга мувофиқ рухсат берилганини тушунтирди.

Палуданнинг хатти-ҳаракатлари биринчи навбатда Туркияда ва бошқа исломий мамлакатларда — масалан, Саудия Арабистони, Иордания, Бирлашган Араб Амирликлари ва Кувайтда норозиликни келтириб чиқарди. Эрон Ташқи ишлар вазирлиги матбуот котиби Носир Канани буни исломофобиянинг кўриниши деб атади.

Ўз навбатида, Швеция ҳукумати аъзолари ҳам Қуръоннинг ёқилишини қоралаб чиқди. Туркия президенти Ражаб Тоййиб Эрдўғон воқеага муносабат билдириб, Швеция энди НАТОга аъзоликда қўллаб-қувватланмаслигини айтди.