Ироқ Туркияни Ироқнинг шимолий ҳудудларида Курдистон ишчилар партияси (КИП) тарафдорларига қарши йирик ҳарбий операция ўтказишда қўллаб-қувватлашга тайёр. Бу ҳақда Anadolu Аjansi хабар берди.
Хабарга кўра, Туркия делегациясининг Бағдодга ташрифи чоғида мазкур масала юзасидан музокаралар бўлиб ўтган. Ироқ ҳукумати курд мухториятининг шимолий ҳудудларида Туркия 30-40 км бўлган буфер зонасини яратишни маъқуллаган.
Маълум бўлишича, охирги уч ойда Туркия, Ироқ ва курд мухторияти расмийлари Анқара 2022 йилдан буён “Панжа-Қалъа” операциясини ўтказаётган минтақаларда бўлиши кутилаётган жанговар ҳаракатлар юзасидан маслаҳатлар ўтказган. Томонлар аллақачон ҳарбий кампания тафсилотлари бўйича келишиб олган. Шимолий Ироқ Курдистонидаги операция Ироқ разведка хизматлари ва курд мухторияти ёрдамига таянади. Бағдод ва Арбил ҳам Сулаймония ҳамда Найнава вилоятларидаги КИП тарафдорларига қарши чора кўришга тайёр эканликларини маълум қилган.
Туркия ТИВнинг 14 март куни хабар беришича, Анқара ва Бағдод терроризмга қарши кураш масалалари бўйича қўмита тузишга қарор қилган. КИП икки давлат хавфсизлигига ҳам таҳдид солаётгани бунга сабаб бўлган. Туркия Ироқнинг КИПни тақиқланган ташкилот қаторига киритиш қарорини олқишлаган.
Изоҳ (0)