Туркия президенти Ражаб Тоййиб Эрдўғон халқаро ўйинчиларни Суриядан “қўлларини тортишга” чақирди ва Анқара мамлакатда террористик гуруҳларнинг фаолиятига чек қўйиш учун етарли салоҳият ва имкониятларга эга эканини айтди.
Reuters нашрининг хабар беришича, бу ҳақда Туркия етакчиси ҳукмрон Адолат ва тараққиёт партияси фракцияси йиғилишидаги нутқи чоғида айтган. Президент ўз нутқида Сурияда фаолият юритаётган, энг аввало, Курдистон ишчилар партияси (КИП) билан боғлиқ террорчи гуруҳларни қуролсизланишга чақирди. У, шунингдек, агар улар буни рад этса, Анқара терроризмни йўқ қилиш йўлини топишига ишонтирди.
Аввалроқ Hurriyet нашри Анқара, агар курд террорчилари қуролларини ташламаса, Сурия билан биргаликдаги операцияни бошлаши мумкинлиги ҳақида хабар берган.
Туркия ташқи ишлар вазири Ҳакан Фидан агар ҳукумат томонидан қўйилган шартлар бажарилмаса, мамлакат Сурия ҳудудида фаолият кўрсатаётган курд қуролли гуруҳларига қарши ҳарбий операция ўтказишга мажбур бўлиши ҳақида таъкидлаган.
“Агар Курдистон ишчилар партияси (КИП) террорчилик ташкилотига нисбатан кутилаётган ишлар бажарилмаса, зарур чоралар кўрилади. Зарур чора эса ҳарбий операциядир”, деди вазир.
У талаблар орасида Сурия ҳудудидан хорижлик террорчиларни чиқариб юбориш, ҳаракат аъзоларининг қолганини эса “қуролларини топшириб, янги маъмурият билан ҳамкорлик қилиш” кабиларни санаб ўтди.
Эрдўғон, шунингдек, Суриянинг парчаланиши хавфи туғилган тақдирда “зарур чоралар” кўришини айтган.
Сурия расмийлари ҳам курд жангариларидан қуролларини ташлашни талаб қилди
Hurriyet нашри Суриянинг янги ҳукумати мамлакат шимолида жойлашган Курдистон ишчилар партиясининг (КИП) жангариларидан қуролларини ташлашни талаб қилгани ҳақида хабар берган эди.
Дамашқда КИПнинг Суриядаги бўлими ҳисобланмиш — Халқ мудофаа кучлари ва Суриянинг янги ҳукумати вакиллари ўртасида учрашув бўлиб ўтган.
Маълум бўлишича, курд томони қуролларни ташлаш талаби эвазига Суриянинг янги армияси таркибида камида битта армия корпуси ёки дивизиясини ташкил этиш, шунингдек, мамлакат шимолидаги нефть конларини тенг тақсимлашни таклиф қилган.
Бироқ янги ҳокимият КИПга қуролларини сўзсиз ташлаб қўйиш шартини қўйиб, бу масалани ҳатто муҳокама қилмади, дейилади хабарда.
Изоҳ (0)