АҚШнинг сайланган президенти, республикачилар етакчиси Дональд Трамп Украина учун яхши келишувга эриша олади.
Бу ҳақда АҚШ давлат котиби Энтони Блинкен маълум қилди, деб хабар бермоқда Германиянинг НTV телеканали.
Унинг таъкидлашича, Трамп маъмурияти яхши ва мустаҳкам тинчлик келишуви йўлида ҳаракат қилади.
“Ишончим комилки, агар украиналиклар хоҳласа, янги маъмурият қулай келишув бўйича музокараларда ёрдам бера олади. АҚШнинг амалдаги президенти Жозеф Байден маъмурияти ва бошқа халқаро ҳамкорлар туфайли Россия Украинани ўзига бўйсундира олмади”, деди Блинкен.
Аввалроқ Трамп президентликка келганидан кейин 100 кун ичида урушни тугатишга ҳаракат қилишини айтган эди.
Трампнинг Украина ва Россия бўйича махсус вакили Кит Келлогнинг таъкидлашича, Трамп яқин келажакда урушни тугатиш қобилиятига эга.
“Менимча, у (Трамп) буни яқин келажакда уддалай олади. Мен унинг бу уруш ҳақиқатан ҳам тугашига олиб келадиган вазиятга эришиш қобилиятига ишонаман”, деган у.
Келлогнинг сўзларига кўра, Трамп Украинадаги вазиятни тартибга солиш жараёнида Москва ёки президент Владимир Путинга ён бериш ниятида эмас.
“Одамлар шуни билишлари керакки, у Путин ёки русларга бирор нарса беришга уринмаяпти. У Украинани қутқаришга ва унинг суверенитетини сақлаб қолишга ҳаракат қилмоқда, ҳамда бу адолатли ва ҳаққоний бўлишига ишонч ҳосил қилмоқчи”, деди Келлог.
Изоҳ (0)