Трамп лавозимга киришиши билан кескин иммиграция сиёсатини қўллаши кутилмоқда 

АҚШнинг сайланган президенти Дональд Трамп жамоаси 20 январь куни ўтказиладиган тантанали маросимдан бир неча соат ўтгач эълон қилинадиган “қаттиқ иммиграцион” қонунлар тўплами устида ишни якунламоқда.

Манбаларга кўра, бу “АҚШда аллақачон истиқомат қилаётган муҳожирлар, шунингдек, АҚШ ва Мексика чегарасида бошпана излаётганларга нисбатан таъқиблар бошланишига олиб келади”. Ноқонуний мигрантларни кенг кўламда чиқариб юбориш режалари мегаполисларда иммиграция ва божхона хизматлари текширувларини, Пентагоннинг қўшимча ресурсларини АҚШнинг жанубий чегарасига жўнатишни, мамлакатга кириш учун янада қаттиқроқ чекловлар жорий этишни ўз ичига олади.

Трамп илгари бир неча бор инаугурациядан кейин Америка тарихидаги энг катта кўламдаги ноқонуний мигрантларни депортация қилиш операциясини ўтказишни мақсад қилганини айтган эди. Шунингдек, дастлабки босқичларда мамлакатдан 1 миллион кишини чиқариб юбориш режалаштирилгани хабар қилинган.

Миграция сиёсатини ривожлантириш халқаро маркази ҳисоботи муаллифларининг баҳолашича, АҚШнинг янги маъмурияти томонидан иммиграция қоидаларининг қаттиқлаштирилиши, жумладан мамлакатда ноқонуний яшовчи миллионлаб одамларнинг депортация қилиниши Европага мигрантларнинг янги тўлқинига сабаб бўлиши мумкин.

Қайд этилишича, бунда Европа иттифоқи мамлакатларига кўчиб борувчиларнинг сезиларли қисмини Лотин Америкаси давлатлари фуқаролари ташкил этади. Ҳисобот муаллифларининг маълумотларига кўра, сайёранинг ушбу қисмидан келганлар аллақачон ЕИда бошпана сўраб мурожаат қилганларнинг умумий сонида “катта улушни” ташкил этади. Шу билан бирга, уларнинг кўпчилигига ҳамжамиятга кириш учун виза талаб қилинмайди.

Трамп сайловолди кампаниясидаги оммавий депортация ҳақидаги ваъдасини бажаришдан бошқа чораси йўқлигини айтган эди.

“Бизда аслида танлов йўқ”, деган Трамп NBC телеканалига берган интервьюсида.

У Жо Байден маъмуриятининг “ўта юмшоқ” сиёсати Қўшма Штатларнинг учинчи дунё давлатига айланишига олиб келганини бир неча бор таъкидлаган. Трамп ўз чиқишларида мигрантларга нисбатан қаттиқроқ чоралар кўриш ва мавжуд миграция дастурларини қайта кўриб чиқиш зарурлигини айтган.