AQSHning saylangan prezidenti, respublikachilar yetakchisi Donald Tramp Ukraina uchun yaxshi kelishuvga erisha oladi.
Bu haqda AQSH davlat kotibi Entoni Blinken ma’lum qildi, deb xabar bermoqda Germaniyaning NTV telekanali.
Uning ta’kidlashicha, Tramp ma’muriyati yaxshi va mustahkam tinchlik kelishuvi yo‘lida harakat qiladi.
“Ishonchim komilki, agar ukrainaliklar xohlasa, yangi ma‘muriyat qulay kelishuv bo‘yicha muzokaralarda yordam bera oladi. AQSHning amaldagi prezidenti Jozef Bayden ma’muriyati va boshqa xalqaro hamkorlar tufayli Rossiya Ukrainani o‘ziga bo‘ysundira olmadi”, dedi Blinken.
Avvalroq Tramp prezidentlikka kelganidan keyin 100 kun ichida urushni tugatishga harakat qilishini aytgan edi.
Trampning Ukraina va Rossiya bo‘yicha maxsus vakili Kit Kellogning ta’kidlashicha, Tramp yaqin kelajakda urushni tugatish qobiliyatiga ega.
“Menimcha, u (Tramp) buni yaqin kelajakda uddalay oladi. Men uning bu urush haqiqatan ham tugashiga olib keladigan vaziyatga erishish qobiliyatiga ishonaman”, degan u.
Kellogning so‘zlariga ko‘ra, Tramp Ukrainadagi vaziyatni tartibga solish jarayonida Moskva yoki prezident Vladimir Putinga yon berish niyatida emas.
“Odamlar shuni bilishlari kerakki, u Putin yoki ruslarga biror narsa berishga urinmayapti. U Ukrainani qutqarishga va uning suverenitetini saqlab qolishga harakat qilmoqda, hamda bu adolatli va haqqoniy bo‘lishiga ishonch hosil qilmoqchi”, dedi Kellog.
Izoh (0)