Кеча, 15 январь куни тунда АҚШ президенти Жо Байден АҚШ, Миср ва Қатарнинг дипломатик саъй-ҳаракатлари натижасида Исроил ва ҲАМАС ўртасида ўт очишни тўхтатиш ва гаровга олинганларни озод қилиш бўйича келишувга эришилганини маълум қилди.
Бу ҳақда Жо Байден президентликдан кетишдан олдин халққа қилган мурожаатида айтиб ўтди.
“Бугун АҚШ, Миср ва Қатарнинг жадал дипломатияси натижасида Исроил ва ҲАМАС ўт очишни тўхтатиш ва гаровга олиш бўйича келишувга эришди”, деди у ўз баёнотида.
Битимнинг Ғазодаги “жанглар”га чек қўйишини, маҳбусларни озод қилишини ва фаластинликларга керак бўлган гуманитар ёрдамни тақдим этишини таъкидлаган Байден, Вашингтоннинг ўт очишни тўхтатиш ҳақидаги хабарни олқишлашини айтди.
“Можароларга барҳам бериш ва тинчлик ҳамда хавфсизликни ўрнатишни аллақачон бошлаш керак эди”, деди у.
Шунингдек, АҚШнинг амалдаги президенти маҳбуслар озод этилишидан, айниқса, хурсанд эканлигини қўшимча қилди.
Баёнот тугаганидан сўнг журналистлардан бири: “Урушни тўхтатишда кимнинг хизматлари катта бўлди? Сизними ёки Трампними?” деб савол берди. Байден эса: “Бу ҳазилми?” деб истеҳзо билан жавоб берди.
Исроил ҳукумати раҳбари идораси хабар беришича, бу хабардан кейин Нетаньяху Трамп билан телефон орқали суҳбатлашган.
“Бош вазир АҚШнинг сайланган президенти Трампга гаровга олинганларни озод қилишда кўрсатган ёрдами учун миннатдорчилик билдирди. Бош вазир гаровдагиларни ҳар қандай йўл билан бўлса ҳам, қайтаришга ҳамиша тайёр бўлганини айтди. Шунингдек, Трампнинг Ғазо энди ҳеч қачон терроризмга бошпана бўлмаслиги учун Қўшма Штатлар Исроил билан ҳамкорлик қилиши ҳақидаги гапларини олқишлашини маълум қилди”, дейилади хабарда.
Томонлар, шунингдек, Ғазо атрофидаги вазият ва бошқа муҳим масалаларни муҳокама қилиш учун Вашингтонда “яқин вақт ичида” учрашув ўтказишга келишиб олдилар, дея қўшимча қилди идора.
Дунё жамоатчилиги бу хабардан сўнг урушни тўхтатишда Байдендан кўра Трампнинг ҳиссаси катта бўлган, деган хулосга келди.
Исроил ҳукумати раҳбари идораси хабар беришича, Нетаньяху Трамп билан суҳбатдан сўнг АҚШнинг амалдаги президенти Жо Байденга ҳам қўнғироқ қилган. Суҳбатда Исроил бош вазири Байденга “гаровга олинганларни озод қилиш бўйича келишувни илгари сургани учун миннатдорчилик билдирди”, дейилади идора хабарида.
Изоҳ (0)