АҚШ президенти Жо Байден гиёҳванд моддалар билан боғлиқ жиноятларда айбланганларнинг ҳукмларини енгиллаштирди.
Оқ уй сайтида таъкидланишича, бу жиноятлар зўравонликсиз содир этилган. Қарийб 2,5 минг кишининг ҳукми юмшатилди.
“Конгресс тан олганидек, ҳукмлардаги бу тафовутларни бартараф этиш вақти келди. Бу тарихий хатоларни тузатиш ва муносиб инсонларга оилаларига қайтиш имкониятини бериш йўлидаги муҳим қадамдир”, деди АҚШ раҳбари.
Узоқ муддат қамоқ жазосига ҳукм қилинган фуқаролар, шунингдек, эндиликда амал қилмайдиган эски қонунлар бўйича ҳукм қилинганлар ҳам афв этилди.
Жо Байден 23 декабрь куни 40 нафар ўлим жазосига ҳукм қилинган маҳбуслардан 37 нафарининг жазосини енгиллаштирган эди. У сайланган президент Дональд Трамп маъмуриятининг “қатл ҳукмини қайта тиклашига” йўл қўя олмаслигини тушунтирди. 12 декабрь куни Байден 1,5 минг нафар кишининг жазосини енгиллаштирди, шунингдек, зўравонликсиз жиноятлар учун айбланган 39 нафар маҳкумни афв этди.
Январь ойи бошида икки маҳбус президентнинг афвини рад этди. Маҳкумлар ҳукмнинг енгиллаштирилиши “уларни ноқулай аҳволга солиб қўйишига” ишонишади, чунки улар ўзларига қўйилган айблов устидан шикоят қилишга уриниб, айбсиз эканликларини таъкидламоқда.
АҚШ судлари ўлим жазосига ҳукм қилинганлар иши бўйича апелляцияларни кучайтирилган текширув доирасида кўриб чиқишлари шарт. Бу эса ишларнинг хатолар бўйича янада синчковлик билан ўрганилишини кафолатлайди. Маҳбуслар бу жараёндан воз кечишни истамасликларини айтишди.
“Судланувчи фаол суд муҳокамасида иштирок этаётган пайтда ҳукмни юмшатиш — уни кучайтирилган текширув кўринишидаги ҳимоядан маҳрум этиш демакдир. Бу судланувчини унинг апелляцияси бекор қилинишига олиб келадиган асосий адолатсизлик ҳолатига тушириб қўяди”, дейди Шеннон Агофски.
Ҳар иккала маҳбус ҳам ҳукмни енгиллаштиришни тақиқлаш тўғрисидаги аризаларида иккинчи адвокат тайинланишини талаб қилмоқда. АҚШ Олий судининг 1927 йилдаги қарорига кўра, президент маҳкумларнинг розилигисиз афв эълон қилиши мумкин.
Изоҳ (0)