Air Astana авиакомпанияси апелляция судида россиялик 12 ёшли йўловчи Зера Галиевага ютқазди. Қиз авиакомпаниянинг эътиборсизлиги туфайли бир ўзи ёлғиз Остона аэропортида қолиб кетганди.
Бу ҳақда Қозоғистон ОАВ хабар бермоқда.
Қайд этилишича, 20 июль куни ўн икки ёшли эгизак қизлар Зере ва Зауре Галиевалар Остонада тўхташ билан АҚШдан Уралскка қайтаётган эди. Бироқ парвозга рўйхатдан ўтиш пайтида FlyArystan авиакомпанияси (Air Astana шўба корхонаси) ходимлари опа-сингиллардан фақат биттасини рўйхатдан ўтказган. Натижада бортга чиқиш талонисиз қолган Зере самолётга қўйилмади. Муаммони ҳал қилишга ваъда берган FlyArystan ходимлари болани Остона аэропортида бир ўзини қолдириб кетишди.
Қиз фақатгина эртаси куни катталар ҳамроҳлигисиз Уралскка учиб кета олди.
Суд мурожаатни кўриб чиқиш чоғида Air Astana вакиллари ўз айбини тан олди, бироқ қизнинг онасидан маънавий зарар учун тўланадиган товон пулини 5 миллион тенгедан (тахминан 10,5 минг доллар) 1,5 миллионгача камайтиришни сўради.
Суд авиакомпаниянинг бу илтимосини рад этди.
2022 йилда Air Astana авиакомпанияси парвозларни кечиктиргани учун жаримага тортилганди. Қозоғистон Фуқаро авиацияси қўмитаси хабарига кўра, жарима Олмаота—Мале рейси узоқ муддатга кечиктирилгани муносабати билан қўлланган.
Суриштирув давомида йўловчилар парвозни 15 соатдан ортиқ кутиб қолгани аниқланган. Шу билан бирга, уларга қонун ҳужжатларида назарда тутилган хизматлар, яъни меҳмонхоналарга жойлаштириш хизматлари лозим даражада тақдим этилмаган. Мазкур ҳолат юзасидан авиакомпания 3 миллион тенгедан ортиқ ёки 6,3 минг доллар миқдорида маъмурий жаримага тортилган.
Изоҳ (0)