Ўзбекистон Транспорт вазирлиги матбуот хизмати 11 сентябрдан Қозоғистон билан мунтазам авиақатновлар расман тикланганини маълум қилди.
Қайд этилишича, Транспорт вазирлиги Қозоғистон авиация маъмурияти билан халқаро мунтазам йўловчи авиақатновларини тиклаш бўйича олиб борган музокаралар якунига кўра, Uzbekistan Airways ва Air Astana авиакомпанияларига сентябрь ойидан бошлаб паритет тамойили асосида Тошкент—Олмаота—Тошкент йўналишида мунтазам парвозларни бажаришни бошлаш бўйича келишувга эришган.
Мазкур йўналиш бўйича қатновлар ҳафтанинг жума кунлари амалга оширилади. Бугундан эътиборан Uzbekistan Airways ва Air Astana авиакомпаниялари ушбу йўналишда парвозларни бажаришни бошлаган.
Air Astana авиакомпаниясининг Олмаота—Тошкент —Олмаота йўналишида парвозни амалга ошириган самолёт 11 сентябрь куни соат 12:40 да Ислом Каримов номидаги «Тошкент» халқаро аэропортига келиб қўнган.
Вазирлик ушбу йўналиш бўйича учиш истагида бўлган йўловчилар батафсил маълумотларни авиакомпанияларнинг расмий веб-сайтларидан олиш мумкинлигини билдирган.
Аввалроқ Uzbekistan Airways 4 сентябрдан Германия, Қозоғистон, Қирғизистон, БАА, Туркия билан мунтазам халқаро авиапарвозларни тиклагани ҳақида хабар қилинганди.
Изоҳ (0)