Қозоғистоннинг Air Astana авиакомпанияси 31 майдан йўлга қўйилиши режалаштирилган Олмаота—Минск авиақатновларининг бекор қилинишини меъёридан кам тижорий юк билан изоҳлади. Бу ҳақда авиакомпания корпоратив коммуникациялар бўлими маълумотларига таяниб «Интерфакс» хабар берди.
«Air Astana 2021 йилнинг 31 май куни очилиши режалаштирилган Олмаота—Минск йўналишини бекор қилди. Қарор 20 май куни қабул қилинган ва меъёридан кам бўлган тижорий юклар сабаб бўлди. Йўловчиларга рейсларнинг бекор қилингани ҳақида ўша куннинг ўзидаёқ хабар берилди», — дейилади компания томонидан тақдим этилган маълумотларда.
24 май куни Қозоғистон Саноат ва инфратузилмавий ривожланиш вазирлигининг матбуот котиби Мадиёр Уакпаевнинг «Интерфакс-Казахстан» агентлигига маълум қилишича, Қозоғистон идоралараро комиссия йиғилишида Беларусь бўйлаб парвозлар масаласи кўтарилади. Йиғилишнинг қачон ўтказилиши ҳозирча маълум эмас.
23 май куни Афинадан Вильнюсга учаётган Ryanair компаниясининг йўловчи самолёти Минск аэропортига қўнишга мажбур бўлди. Самолёт Литва ҳудудига яқинлашаётган эди, лекин учувчи йўналишни Беларусь пойтахтига буриб юборди. Компаниянинг маълум қилишича, Беларусь авиадиспетчерлари самолёт бортида юзага келиши мумкин бўлган хавф ҳақида хабар бергани учун самолёт Минск аэропортига қўнган. Лекин бу маълумот тасдиқланмаган. 23 май куни Ryanair самолётида Афинадан Вильнюсга учиб келаётган беларуслик мухолифат фаоли ва блогер, Nexta ахборот портали асосчиси, ҳукумат томонидан террорчи деб тан олинган Роман Протасевич ёнидаги таниши, Вильнюсдаги Европа гуманитар университети талабаси, Россия фуқароси София Сапега билан бирга Минск аэропортига қўнгач қўлга олинган. Литва президентининг ташқи сиёсат бўйича бош маслаҳатчиси Аста Скайсгиритенинг маълум қилишича, йўловчи ташувчи самолётни қўндириш учун Беларусь ҳукумати МиГ-29 қирувчи самолётидан ва Ми-24 ҳарбий вертолётидан фойдаланган.
Аввалроқ Беларусь Протасевични давлатлараро қидирувга берган эди. 2020 йилнинг ноябрь ойида Беларусь Бош прокуратураси уни ҳибсга олиш ва Беларусдаги тартибсизликларда айбланувчи сифатида жиноий жавобгарликка тортиш учун экстрадиция қилиш илтимоси билан Польша Адлия вазирлигига мурожаат йўллаган.
Эслатиб ўтамиз, Беларусдаги президентлик сайловлари 2020 йил 9 август куни ўтказилган. МСК маълумотига кўра, Лукашенко 80,1 фоиз овоз билан сайловларда ғолиб деб топилган. У мамлакатни 26 йилдан буён бошқариб келмоқда. Сайлов куни Минск марказида ҳарбий техника пайдо бўлган. Пойтахт Минскда президент сайловидан кейин норозилик намойиши бошланган. Шундан кейин мамлакатда норозилик намойишлари ва намойишчиларни қўллаб-қувватлаш учун чиқишлар давом этган. Шу каби норозилик намойишларининг бирида Лукашенко ўз қароргоҳига қўлида автомат билан учиб келганди, уни тўлиқ қуролланган ўғли — Николай қўриқлаган.
Изоҳ (0)