Air Astana aviakompaniyasi apellyatsiya sudida rossiyalik 12 yoshli yo‘lovchi Zera Galiyevaga yutqazdi. Qiz aviakompaniyaning e’tiborsizligi tufayli bir o‘zi yolg‘iz Ostona aeroportida qolib ketgandi.
Bu haqda Qozog‘iston OAV xabar bermoqda.
Qayd etilishicha, 20-iyul kuni o‘n ikki yoshli egizak qizlar Zere va Zaure Galiyevalar Ostonada to‘xtash bilan AQSHdan Uralskka qaytayotgan edi. Biroq parvozga ro‘yxatdan o‘tish paytida FlyArystan aviakompaniyasi (Air Astana sho‘ba korxonasi) xodimlari opa-singillardan faqat bittasini ro‘yxatdan o‘tkazgan. Natijada bortga chiqish talonisiz qolgan Zere samolyotga qo‘yilmadi. Muammoni hal qilishga va’da bergan FlyArystan xodimlari bolani Ostona aeroportida bir o‘zini qoldirib ketishdi.
Qiz faqatgina ertasi kuni kattalar hamrohligisiz Uralskka uchib keta oldi.
Sud murojaatni ko‘rib chiqish chog‘ida Air Astana vakillari o‘z aybini tan oldi, biroq qizning onasidan ma’naviy zarar uchun to‘lanadigan tovon pulini 5 million tengedan (taxminan 10,5 ming dollar) 1,5 milliongacha kamaytirishni so‘radi.
Sud aviakompaniyaning bu iltimosini rad etdi.
2022-yilda Air Astana aviakompaniyasi parvozlarni kechiktirgani uchun jarimaga tortilgandi. Qozog‘iston Fuqaro aviatsiyasi qo‘mitasi xabariga ko‘ra, jarima Olmaota—Male reysi uzoq muddatga kechiktirilgani munosabati bilan qo‘llangan.
Surishtiruv davomida yo‘lovchilar parvozni 15 soatdan ortiq kutib qolgani aniqlangan. Shu bilan birga, ularga qonun hujjatlarida nazarda tutilgan xizmatlar, ya’ni mehmonxonalarga joylashtirish xizmatlari lozim darajada taqdim etilmagan. Mazkur holat yuzasidan aviakompaniya 3 million tengedan ortiq yoki 6,3 ming dollar miqdorida ma’muriy jarimaga tortilgan.
Izoh (0)