Қозоғистоннинг Fly Arystan авиакомпаниясига тегишли Туркистондан Истанбулга учаётган самолёти Урганчга фавқулодда қўнди. Бу ҳақда Telegram’даги «Новости Ташкенцкого неба» канали хабар берди.
Қайд этилишича, Қозоғистон лоукостер авиакомпанияси КC7425 йўловчи самолёти экипажи 4 январь куни Урганч захира аэропортга қўниш ҳақида қарор қабул қилган.
Uzbekistan Airports матбуот хизмати ҳолат юзасидан расмий маълумот бериб, самолётнинг фавқулодда қўнишига йўловчилардан бири — Туркия фуқаросига шошилинч тиббий ёрдам зарурлиги сабаб бўлганини маълум қилди.
Шу сабабли экипаж соат 18:05 да бортида 150 нафар йўловчи бўлган самолётни яқин орадаги аэропортга қўндиришга қарор қилган. Самолёт аэропортга қўнганидан сўнг йўловчи тез тиббий ёрдам машинасида олиб кетилиб, малакали тиббий ёрдам кўрсатиш учун Урганчдаги тиббиёт муассасасига ётқизилган.
Fly Arystan самолёти ўз манзили — Истанбулга яқин соатларда учади.
Эслатиб ўтамиз, 2021 йил май ойидаги келишувга мувофиқ Air Astana авиакомпанияси таркибига кирувчи Fly Arystan авиакомпанияси томонидан 21 июндан бошлаб Туркистон—Тошкент—Туркистон йўналишида ҳафтасига 2 маротаба қатнов йўлга қўйилган.
Изоҳ (0)