Тошкент шаҳар Жиноят ишлари бўйича Сергели туман суди стюардессага шилқимлик қилган фуқаро ишини кўриб чиқди. 39 ёшли судланувчига қилмиши учун 5 сутка маъмурий қамоқ жазосини тайинлади.
Суд кеча, 2025 йилнинг 7 январь куни бўлиб ўтди.
Суд ҳужжатида келтирилишича, 2024 йил 31 декабрь куни Сочи—Тошкент йўналиши бўйича Ўзбекистонга учиб келаётган 39 ёшли эркак самолёт бортида маст ҳолатда Uzbekistan Airways авиакомпаниясининг 23 ёшли ходими, борт кузатувчиси бўлган қиз танасининг ёнбошини бир неча маротаба ушлаб, унга нисбатан шаҳвоний шилқимлик қилган.
Суд мажлисида сўз олган судланувчи самолёт бортида қўлидаги нарса полга тушиб кетгани учун ўша нарсани олиш мақсадида полга эгилганини, шу пайтда қўли бехосдан ёнидан ўтиб кетаётган борт кузатувчисига тегиб кетганини, шилқимлик қилмаганини, бундай ҳолат бошқа қайтарилмаслигини ва унга енгиллик беришни сўраган.
Судда сўроқ қилинган Uzbekistan Airways авиакомпанияси ходими эса ўша куни Сочи—Тошкент йўналиши билан учиб келаётган рейсдаги йўловчиларга хизмат кўрсатаётганида шу йўловчи маст ҳолда бир неча маротаба унинг ёнбошига қўли билан тегиниб, шилқимлик қилганини, у йўловчига бундай ҳаракатларини тўхтатишни сўраб танбеҳ берганлигини, эркак эса ҳаракатларини тўхтатмаганлигини шунингдек, унга қўпол муомалада бўлишда давом этганини айтиб, суддан судланувчига қонуний чора кўришни сўраган.
Суд 39 ёшли эркакни Маъмурий жавобгарлик тўғрисидаги кодекснинг 41-1-моддасининг 1-қисмида назарда тутилган ҳуқуқбузарликни (шаҳвоний шилқимлик қилиш, яъни шахсга нисбатан унинг учун номақбул бўлган ҳамда унинг шаъни ва қадр-қимматини таҳқирлайдиган, шахснинг ташқи қиёфасини ёки қадди-қоматини тавсифлашда, имо-ишора қилишда, тегинишда, чақиришда ифодаланган, шаҳвоний хусусиятга эга бўлган ҳаракатларни бир марта қўпол равишда ёки бир неча марта содир этиш) содир этганликда айбли деб топди ва 5 сутка маъмурий қамоқ жазосини тайинлади.
Изоҳ (0)