Туркия қизиқарли ва юқори сифатли сериаллари туфайли бошқа хорижий мамлакатларда ҳам танилган. Кино танқидчилар ушбу мамлакат киносининг дунё саҳнасида катта келажаги бор, деб айтади, чунки истеъдодли турк актёр ва актрисаларининг сафи кенгайиб бормоқда. Шунинг учун қуйида улардан бир қанчаси машҳур бўлгунга қадар иштирок этган 5 та сериални кўриб чиқишга қарор қилдик.
“Муҳташам юз йил” (2011-2014)
Бежизга ҳар иккинчи турк актёри ёки актрисаси ўз фаолиятини “Муҳташам юз йил” сериалидан бошлаган, деб айтишмайди. Чунки лойиҳа узоқ вақт давом этадиган 4 фаслдан иборат бўлиб, юздан ортиқ актёрлар иштирок этган. Карьерасини “Муҳташам юз йил” сериалидан бошлаганлар орасида Мерем Узерли, Селма Эргеч, Селим Bayraktar, Энгин Озтурк, Эзги Эюбўғлу, Буржу Ўзберек, Толга Сариташ ва бошқалар бор.
“Қирғоқ” (2013-2015)
“Қирғоқ” сериали 2013—2015 йилларда намойиш этилган. Унда бош қаҳрамонлар ролини Чағатай Улусой ва Серенай Сарикая гавдалантирган. Лойиҳа 77 қисмдан иборат. Бу сериални ҳақли равишда афсонавий деб аташ мумкин, чунки унда жуда кўп истеъдодли актёрлар иштирок этган. Мелодраманинг суратга олиш жараёнлари Мармара денгизи бўйида жойлашган Истанбул ҳудудида бўлиб ўтган.
Танер Олмез, Ҳазар Эржуглу, Мирай Данер, Мерич Арал, Чаглар Эртугрул каби актёрлар кино саноатига биринчи қадамни айнан шу сериалдан қўйган.
“Курт Сеит ва Александра” (2014)
Ажойиб турк сериалида бош ролни “Тақиқланган севги” даги образи билан танилган Киванч Татлитуг, “Бебаҳо вақт” орқали машҳур бўлган Фараҳ Зейнеп Абдулла кабилар ўйнаган. Шунингдек, сериалда актёрлик фаолиятини энди бошлаган Демет Оздемир, Элчин Сангу, Мелиса Асли Памук, Биркан Соккулу кабилар ҳам иштирок этган. Унда инқилоб йилларида Россия империясидан келган муҳожирларнинг тақдири ҳақида ҳикоя қилинади.
“Қора гул” (2013-2016)
4 фаслдан иборат мазкур сериал 2013 йилдан 2016 йилгача эфирга узатилган. “Қора гул” классик турк драмаси ҳисобланади ва унда Туркия қишлоқларидан биридаги катта оила ҳаёти ва муносабатлари акс эттирилган. 125 қисм давомида фитналар, фош этиш ва тан олиш каби ҳолатлар кузатилади.
Сериалда ёши катта ва таниқли актёрлардан Ўзжан Дениз, Шериф Сезер, Эже Услу каби машҳурлар иштирок этган. “Қора гул” сериалида актёрлардан Ҳилал Алтинбилек, Мерт Язичиўғлу, Севда Эргинжи, Айча Айшин Туран, Илайда Чевик, Бурак Челик кабилар дебют қилган.
“Кичкина ёлғончилар” (2015)
Паст рейтинг туфайли атиги 13-қисмдан сўнг сериал ёпилган, лекин кўпчилик актёрлар ушбу лойиҳадан сўнг бошқа лойиҳалар учун таклиф олган. Бурак Дениз, Бушра Девели, Алперен Дуймаз, Мелиса Шенолсун, Дилан Чичек Дениз, Бенсу Сорал, Дениз Жан Акташ, Озан Долунай ва Ўзге Озажар каби актёр ва актрисалар ушбу сериалда ўз фаолиятини бошлаган.
Изоҳ (0)