13 ноябрь куни АОКАда InnoWeek.Уз-2024 ҳафталигига бағишланган матбуот анжумани бўлиб ўтди.
Унда Инновацион ривожланиш агентлиги раҳбари ва бошқа масъуллар иштирок этди. 14-16 ноябрь кунлари “Барқарор ривожланиш учун инновациялар” шиори остидаги ҳафталикда 30 дан ортиқ давлат вакиллари қатнашиб, 500 дан ортиқ инновацион маҳсулотлар кўргазмага қўйилади.
Ҳафталикда Хитой, Россия, Туркия ва бошқа давлатлардан келган мутахассислар илм-фан ва инновациядаги ўзгаришлар ҳақида фикр алмашадилар. Шунингдек, “Глобал инновация индекси” форумида Ўзбекистонни ривожланган 50 давлат қаторига киритиш учун қадамлар муҳокама қилинади.
Ҳафталикнинг илк куни “Ҳудудларни инновацион ривожлантириш” мавзусида халқаро семинар ўтказилади. Унда Туркия ва Испаниянинг инновацион экотизимдаги тажрибалари кўриб чиқилади.
Эрон ва Ўзбекистон ўртасидаги ҳамкорликни мустаҳкамлаш мақсадида ўзбек-эрон инновацион технологиялар форуми ҳам ўтказилади. Форум доирасида биотехнология, фармасевтика ва ахборот технологиялари соҳаларида B2B учрашувлар бўлиб ўтади.
Ёш олимлар учун “Фан ва инновациялар” халқаро конференцияси ташкил этилади. Конференцияда Буюк Британия, Германия, Хитой каби давлатлардан олимлар иштирок этиб, биотехнология ва генетика соҳасидаги ютуқларни муҳокама қиладилар.
Урбан.Теч Uzbekistan 24 хакатонида 18-30 ёшдаги ёшлар ижтимоий-иқтисодий муаммоларга инновацион ечимлар тақдим этади. Ҳар бир тадбир ёшлар ва инновацион ғоялар учун имкониятларни кенгайтиришни мақсад қилган.
Изоҳ (0)