Кипрда суриялик ноқонуний муҳожирлар сонининг сезиларли даражада ортиши сабабли Европа Иттифоқи Ливан билан миграция келишувини ишлаб чиқаётганини маълум қилди. Бу ҳақда Кипр президенти Никос Христодулидис ахборотига таяниб, Deutsche Welle хабар берди.
Христодулидис Кипрга қочқинлар кирмаслиги учун Ливанга улар билан шуғулланишда ёрдам беришини таъкидлаган.
Кипр раҳбари 2 май куни Европа комиссияси президенти Урсула фон дер Ляйен билан Ливанга бориб, ёрдам пакетининг аниқ мазмунини эълон қилишини айтган. Христодулидис бу молиявий ёрдам Ливан ҳукуматини, шу жумладан, армияни қўллаб-қувватлаш чораларини ўз ичига олишини айтган.
Кипр президенти ўз мамлакатидаги вазиятни кескин деб атаган. Шунингдек, суриялик қочқинларни ортиқ қабул қила олмаслигини таъкидлаган. У барча сурияликлар Европа Иттифоқидан бошпана олиши керакми ёки йўқлигини муҳокама қилиш мақсадида ёрдам сўраб Брюсселга мурожаат қилган.
Биз Суриянинг айрим ҳудудларини сўзсиз хавфсиз деб таснифлашга чақирамиз, — деди у.
Ливандан 160 км узоқликда жойлашган Ўрта Ер денгизидаги оролга жорий йил бошидан буён 4 мингга яқин муҳожир етиб келган. 2023 йилнинг биринчи чорагида бу кўрсаткич 78 кишини ташкил этган. Кипрдаги қочқинлар лагерлари тўлган ва расмийлар сурияликларнинг бошпана сўраш аризаларини кўриб чиқишни тўхтатган. 5,3 миллион аҳолига эга ва ўз тарихидаги энг оғир молиявий инқирозни бошидан кечираётган Ливанда 1,5 миллиондан ортиқ суриялик қочқин яшамоқда.
Изоҳ (0)