Тадбиркор Павел Дуров биринчи марта Париж судида Telegram мессенжерида модерация етарли бўлмаган иш бўйича сўроқ қилинди. Бу ҳақда AFP’га таяниб 20Minutes хабар берди.
Сўроқ 6 декабрь куни бўлиб ўтди. Дуров ўз адвокатлари Давид-Оливье Камински ва Кристоф Ингрен билан судга келди. Бизнесмен журналистларга батафсил изоҳ беришдан ўзини тийиб, фақат француз адолат тизимига ишонч билдириш билан чекланди.
Адвокат Камински Дуровнинг Telegram орқали содир этилган жиноятларга алоқадорлиги ҳақидаги айблов позициясини бемаъни деб баҳолади.
Дуровнинг ҳибсга олиниши
Telegram асосчиси 24 август куни Озарбайжондан Парижга шахсий самолётида борганда Ле Бурже аэропортида қўлга олинди. У француз ҳуқуқ-тартибот идоралари ходимлари билан Telegram’да кибер ва молиявий жиноятлар масалаларида ҳамкорлик қилишдан бош тортганликда айбланди.
Париж суди уни платформага алоқадор аввал эълон қилинган 12 та ҳуқуқбузарликдан 6 тасида, жумладан, ҳукумат билан ҳамкорлик қилишдан бош тортишда, болалар порнографиясини тарқатишда, наркотрафикда иштирок этишда, шунингдек, уюшган гуруҳ таркибидаги фирибгарликда айблади. 29 август куни у 5 миллион евро миқдорида гаров тўлаш, ҳафтада икки марта полиция участкасига келиш, Францияни тарк этмаслик шарти билан озод қилинди.
Liberation нашрининг ёзишича, Дуров сўроқ пайтида Франция контрразведкаси билан махсус алоқа канали борлигини, бу орқали бир неча терактларнинг олди олинганини айтган. Шу билан бирга, манбалар газетага маълум қилишларича, 2013 йилдан 2024 йилгача Франция полицияси Telegramъдан 2460 та сўровга жавоб олмаган.
Сентябрь ойида Telegram нафақат Франция, балки бошқа мамлакатларнинг ҳуқуқ-тартибот идоралари билан ҳамкорлик қила бошлагани ҳақида хабар берилган эди.
Хусусан, Европа иттифоқининг номи ошкор этилмаган давлати юзга яқин қотилликлар муҳокама қилинган Telegram гуруҳи бўйича сўровига жавоб олишга муваффақ бўлган.
Францияда эса мессенжер вояга етмаганлар миллий полиция бошқармаси (Офмин) томонидан бир нечта жиноий терговларда берилган сўровларга жавоб бериб, аксар гумондорларни аниқлаши мумкин бўлган материалларни тақдим этган.
Изоҳ (0)