Украина ташқи ишлар вазири Андрей Сибига россиялик ҳамкасби Сергей Лавров нутқи бошланишидан олдин Европада хавфсизлик ва ҳамкорлик ташкилоти ялпи мажлислар залини тарк этди.
Бундан олдин нутқининг якунида Сибига Лавровни “ҳарбий жиноятчи” деб атади.
Аввалроқ Польша ва Чехия ТИВ раҳбарлари Радослав Сикорский ҳамда Ян Липавскийлар Лавровнинг нутқига қулоқ солмасликларини айтиб, зални тарк этишганди.
Сикорский Лавровни саммитга Россиянинг Украинага бостириб киргани ҳақида ёлғон тарқатиш учун келганликда айблади.
Малтанинг Россиядаги элчихонаси ЙХҲТ Вазирлар кенгаши йиғилишини 5-6 декабрь кунлари ушбу мамлакатда ўтказиш тўғрисидаги қарор “барча аъзоларга, шу жумладан Россияга ҳам тегишли”лигини тасдиқлаган.
Лавров Европа иттифоқига охирги марта Россия-Украина уруши бошланишидан олдин – 2021 йил декабрида ташриф буюрган эди. Ўшанда ЙХҲТ Вазирлар кенгаши йиғилиши Швеция пойтахти Стокгольмда бўлиб ўтган. 2022 йил февраль ойидан бошлаб Лавров Европа иттифоқининг шахсий санкцияларига дучор бўлган, хусусан, унинг ЕИдаги активларини музлатилган.
2023 йил февраль ойи бошида Австрия ТИВ раҳбари Александр Шалленберг мамлакат парламентида сўзлаган нутқида ЙХҲТ тадбирларидаги россиялик вакиллар санкцияга дучор бўлган тақдирда ҳам кириш ҳуқуқига эгалигини айтган.
2023 йил ноябрь ойида Лавров Европа иттифоқига аъзо бўлмаган, аммо НАТО таркибига кирувчи Шимолий Македонияда ЙХҲТга аъзо давлатлар ташқи ишлар вазирликлари раҳбарларининг йиғилишида иштирок этган эди. Шу сабабли Латвия, Литва, Эстония, Польша ва Украина вакиллари Скопедаги тадбирга келишдан бош тортган.
2022 йилда ЙХҲТга раислик қилган Польша Лавровни Лодзда бўлиб ўтган ЙХҲТ Вазирлар кенгаши йиғилишида иштирок этиши учун мамлакатга киритишдан бош тортган.
Изоҳ (0)