Американинг Аляска штатига қарашли Андреан ороллари яқинида 6,1 магнитудали зилзила юз берди. Бу ҳақда Европа-Ўрта Ер денгизи сейсмологик маркази хабар берди.
Қурбонлар ва вайронагарчиликлар ҳақида маълумотлар йўқ. Цунами хавфи эълон қилинмаган.
Мутахассисларнинг қўшимча қилишича, зилзила эпицентри тахминан 4,4 минг киши истиқомат қилувчи Уналаска шаҳридан 789 км жануби-ғарбда жойлашган. Сейсмик ҳодиса манбаи 10 км чуқурликда жойлашган.
Аввалроқ АҚШ Геология хизмати Калифорния штати шимолида 7 магнитудали зилзила содир бўлгани ҳақида хабар берган эди.
Сан-Франциско кўрфази ҳудудида зилзилалар қайд этилган. Калифорния ва Орегон штатларининг қирғоқбўйи аҳолисига қуйидагича огоҳлантириш юборилган: “Сизнинг яқинингиздаги қирғоққа бир қатор кучли тўлқинлар ва шиддатли оқимлар урилиши мумкин. Сиз хавф остисиз. Қирғоқ сувларидан тезда узоқлашинг”.
Геология хизмати маълумотларига кўра, зилзила 5 декабрь куни маҳаллий вақт билан соат 10:44 да (Тошкент вақти билан кечаси 23:44 да) юз берган, унинг эпицентри Гумболд округидан тахминан 10 миля (16 километр) жануби-ғарбда жойлашган.
АҚШда кузатилган сўнгги кучли зилзилалар
2014 йилнинг ёзида Калифорнияда 6 магнитудали зилзила содир бўлди. Бу ўша пайтдаги сўнгги 25 йилдаги энг кучли зилзила эди. Унинг эпицентри Америка Канони шаҳридан 6 километр шимоли-ғарбда ва Напа шаҳридан 9 километр жанубда жойлашган.
2019 йил ёзида 6,4 магнитудали зилзила Лос-Анжелесдан 196 километр узоқликда қайд этилган, зилзилалар Лас-Вегасда сезилган. У 1994 йилдан бери Калифорниянинг жанубида энг кучлиси бўлганди.
Изоҳ (0)