Донор давлатлар Брюсселда бўлиб ўтган анжуманда Сурия халқи ва қўшни давлатлардаги суриялик қочқинларга ёрдам бериш учун яна 8,1 миллиард доллар ажратишга келишиб олди. Бу ҳақда Associated Press хабар берди.
Хабарга кўра, грант шаклидаги 4миллиард доллар 2024 йилда, яна 1,3 миллиард доллар кейинроқ ажратилади.
Яна 2,5 миллиард евро кредит шаклида берилади, — дея қўшимча қилган нашр.
Германия ТИВ мамлакат юқоридаги суммадан 1,1 миллиард доллар ажратишини маълум қилган. Мазкур маблағ 2023 йил февралида минтақада содир бўлган ва 59 минг кишини, жумладан, Суриядаги 6 минг кишининг ҳаётига зомин бўлган зилзила оқибатларини бартараф этишга сарфланади.
Сурияда фуқаролик уруши 2011 йилда бошланган. Жангларда 500 мингга яқин одам ҳалок бўлган, 23 миллионлик мамлакат аҳолисининг ярмига яқини уйларини ташлаб кетишга мажбур бўлган. Ҳозирда қўшни Туркия, Ливан ва Иорданияда 5,7 миллион суриялик қочқин бор. Башар ал-Ассад режими ва унинг мухолифлари ўртасидаги можаронинг мамлакат ичидаги сиёсий ечим истиқболи ҳали кўринмаяпти.
Аввалроқ Европа Иттифоқининг саккиз мамлакати – Австрия, Греция, Дания, Италия, Кипр, Малта, Польша ва Чехия Суриядаги вазиятни қайта кўриб чиқишга чақирган. Уларнинг фикрига кўра, мамлакатда тўлиқ сиёсий барқарорликка ҳали эришилмаган бўлса-да, Суриянинг айрим ҳудудларини қочқинлар қайтиши учун хавфсиз деб ҳисоблаш мумкин.
Бироқ халқаро гуманитар ташкилотлар, масалан, Халқаро Қизил Хоч қўмитаси, суриялик қочқинларнинг оммавий қайтиши учун ҳозирча шароит йўқлигини таъкидлаган. Германия расмийси Брюсселдаги анжуманда ҳукумат мамлакатдан қочган сурияликларни ватанига мажбуран жўнатишга қарши эканини айтган.
Биз аниқ айтишимиз керак: Сурияга қайтиш мамлакатдаги вазият хавфсиз бўлгандагина мумкин бўлади ва фақат ихтиёрий асосда амалга оширилиши мумкин, — дея унинг сўзларини келтиради dpа.
Изоҳ (0)