Россиянинг Neiry биотехнология лабораторияси Brainy номли янги қурилма — моҳиятан “Гарри Поттер” фильмидаги тақсимлаш шляпасини тақдим этди. Унинг ёрдамида мактаб ўқувчилари касб танлаш бўйича индивидуал тавсияларни олишлари мумкин.
Шляпа электроэнсефалограмма ва фотоплетизмограммани ўқийдиган электродлар тузилган махсус боғичлардан иборат. Тизим компьютерга уланган бўлиб, бош миядаги турли функциялар: диққат, чарчоқ, стресс, дам олиш, жараёнга жалб қилиш ва бошқа параметрларни таҳлил қилади.
Шлпая бош мияни таҳлил қилаётган пайтда ўқувчи маълум бир фандан тестни ечади, шундан сўнг тизим батафсил ҳисоботни ишлаб чиқади. Ўқувчи натижаларни касбга йўналтириш бўйича мутахассис билан муҳокама қилиши мумкин.
Brainy тақсимловчи шляпаси ўқувчи томонидан бажарилган тест жавобларининг тўғри ёки нотўғрилигини текширадиган бошқа касбга йўналтириш тизимидан фарқ қилади. У бош мия ва юрак фаолиятини таҳлил қилади: ўсмирнинг турли масалаларни ечишда ўзини қанчалик қулай ҳис қилиши, қайси йўналишда юқори самара кўрсатиши ва рақобатбардош бўла олишини кўрсатиб беради.
Мазкур тизим бўлажак талабаларга мос университет ёки коллежни танлашга ёрдам беради. Мутахассислар фикрига кўра, Brainy кашфиёти ёшларнинг касбий муваффақиятга эришишга қўйиладиган илк қадамлардан биридир.
Ушбу тестдан 14 ёшдан 18 ёшгача бўлган барча мактаб ўқувчилари ўтиши мумкин. Ҳозирда Brainy тизимидан етакчи университетлар, таълим платформалари ва Москва ҳукумати фойдаланмоқда.
Изоҳ (0)