20 йил олдин қўрқоқ, лекин жуда ёқимтой малласоч йигит Рон Уизли қалбимизни забт этганига ишониш қийин. Франшизадан сўнг актёр узоқ вақт экранларда кўринмади. Лекин охир-оқибат омад унга кулиб боқди.
Гринт болалигидан театрни яхши кўргани учун актёрлик билан шуғулланган
Руперт болалигида музқаймоқчи бўлишни орзу қилганини тан олган бўлса-да, бошланғич синфда у театрга жиддий қизиқиб қолган. Ўшандан бери доимий равишда мактаб спектаклларида қатнашган, шунингдек, маҳаллий театр клубига аъзо бўлган. Гринт актёрликка шунчалик берилиб кетадики, 16 ёшида Руперт бутун эътиборини ижодий фаолиятига қаратиш учун мактабни ташлайди.
Актёр реп ўқиганидан кейин Рон Уизли ролини олади
Гринт Гарри Поттер китобларини яхши кўрарди. Шу боис телевизорда фильм суратга олинаётгани, кастинг ўтказилаётгани ҳақидаги хабарни кўргач, дарҳол ариза жўнатади.
Ролни олиш учун ёш актёрнинг ўзи Рон Уизлини қандай ўйнашни хоҳлаши ҳақида реп ёзади ва ўз трекини ижро этувчи видео суратга олади. Уни дарҳол пайқашади ва юзма-юз учрашувга таклиф қилишади. Натижада Руперт илгари ҳеч қачон фильмларда рол ўйнамаган, одатда фақат мактаб спектаклида иштирок этган бўлса-да, ролни қўлга киритади.
Гринт Рон ролига мослашмайди – у ўзини ўйнайди
Актёрнинг айтишича, у Рон Уизлига жуда ўхшайди. Нафақат ташқи жиҳатдан, балки характерда ҳам. Гринт қаҳрамони билан ўзини бир одамдек ҳис қилади ва суратга олиш охирида рол ўйнамайди, балки деярли ўзини ижро этади. Руперт персонажига шунчалик мослашадики, ҳатто режиссёр Мартин Скорсезе ҳам унинг “Поттер” фильмидаги ижросини қайд этади.
Айтганча, актёр Рон исмига осонгина жавоб қайтаришини тан олади: “Бу иккинчи исмим”. Рупертнинг ҳаётида ҳатто қаҳрамониникига ўхшаш кулгили воқеа ҳам юз берган.
“Гарри Поттер ва Азкабан маҳбуси” янги режиссёр томонидан суратга олинади. Ёш актёрлар билан танишиш учун у Даниэль Редклифф (Гарри Поттер), Эмма Уотсон (Гермиона Гренжер) ва Руперт Гринтдан ўз қаҳрамонлари ҳақида иншо ёзишни сўрайди. Аммо Руперт умуман ҳеч нарса ёзмаган — Рон ҳам шундай қилган бўларди, дейди.
“Поттер” фильмини суратга олиш жараёнида Гринт 4 та қўшимча лойиҳада рол ўйнайди
Актёр банд бўлишига қарамай, “Гарри Поттер”дан ташқари бир нечта фильмларда ўйнайди ва ҳаммасида турли образларда пайдо бўлади.
2002 йилда “Момақалдироқ” комедияси чиқади. Руперт бу ерда ҳид билмасликдан азият чекадиган экцентрик вундеркиндни ўйнайди. 4 йилдан сўнг Гринт “Ҳайдовчилик дарслари” фильмида ҳам рол ижро этади. Фильмда актёр кекса актриса билан дўстлашган ғамгин ўспирин сифатида қайта туғилади.
2009 йилда Гринт “Олчали бомба” фильмида пайдо бўлди. У қизнинг эътиборини қозониш учун дўсти билан рақобатлашадиган йигит образини яратди. Ниҳоят, 2010 йилда Руперт “Ёввойилар” фильмида тажрибали жиноятчининг шогирди ролини ўйнайди. Актёр учун бу фильм ҳам ўзини бутунлай бошқа ролда синаб кўриш имконияти эди.
Томошабинлар барча 4 та фильмни совуққонлик билан кутиб олишган бўлса-да, танқидчилар Руперт Гринтнинг ўйинини алоҳида таъкидлашади.
Поттериандан кейин Гринт ижодий кризисга дуч келади
Франшизани суратга олиш пайтида Руперт жуда чарчаган эди. Бир марта у ҳаттоки ролини “бўғувчи” деб атаган. Бироқ Гринт 2009 йилда суратга олиш тугашидан қўрқишини тан олади: “Доим Гарри Поттер тугаши билан актёрлик карерам мен учун тугаши мумкин деб ўйлайман. Актёрлигимга нисбатан менда бир оз хавотир бор”.
Сўнгги фильм чиққандан сўнг актёр дарҳол кўп бўш вақтга эга бўлади. Аввалига бу Гринтга ёқади. Аммо кейинроқ у янада хавотирлана бошлайди: “Бошқа нима қилишимни билмайман. Мен фақат битта персонажни ўйнай оламанми? Аста-секин Гринт бошқа образларга мослаша бошлади ва ижро услубини ривожлантиради.
Актёрга шунчалик кўп бир хил роллар таклиф қилиндики, у ҳатто кинодан кетишни ҳам хоҳлайди
2011 йилда омон қолган бола ҳақидаги франшизанинг охирги қисми чиқди. Интервьюлардан бирида Гринт Поттердан кейин унга таклифлар бўйича омади келмаётганини айтди. У жиддий, чуқур қаҳрамонларни ўйнашни хоҳларди. Режиссёрлар эса Рупертга Рон Уизли образига ўхшаш ўнлаб ролларни таклиф қилишади.
Шундай пайтлар бўладики, актёр касбини ўзгартириш ҳақида ўйлайди. Айтганча, бу вақтда Гринт болаликдаги орзусини амалга оширади — у музқаймоқ машинаси сотиб олади. Шунга қарамай, у театрда бўлгани каби фильмларда ҳам ўйнашни давом эттиради. 2014 йилда актёр ҳатто Бродвейда дебют қилади ва нуфузли мукофотга сазовор бўлади.
2010 йилларда Гринт атиги 4 та фильмда ўйнаган, кўпинча телекўрсатувларда иштирок этган
Ниҳоят Рон Уизли образи билан хайрлашишга уриниб, 2010 йилларда Гринт 4 та фильмда суратга тушган. Улардан фақат 2 тасида актёр бош ролларни ижро этган.
2012 йилда “Оқ асирликда” фильмида Руперт салбий — учувчи ролини ўйнади. 2015 йилда эса “Ой фирибгарлиги” фильмида Гринт дўстидан қўшимча пул ишлашга қарор қилган фирибгар сифатида қайта туғилди. Яна иккита лентада — “Хавфли иллюзия” ва 2013 йилда “CBGБ клуби” картинасида актёр кичик ролларни ўйнаган.
Актёр 8 йилдан бери ажойиб таклифни кутди
2019 йилдаги энг кўзга кўринмас ва ҳатто муваффақиятсиз лойиҳалардан сўнг, омад ниҳоят актёрга кулиб боқди. Яқинда Гринт бир нечта муваффақиятли лойиҳаларда рол ўйнади. Уни “Хизматкорли уй” телесериалидаги бош ролда кўриш мумкин. Актёр “Гилермо дел Торонинг кабинети”нинг бир эпизодида ҳам суратга тушган. Ниҳоят 2023 йил февраль ойида Руперт Гринт иштирокидаги “Эшикни тақиллат” фильми чиқди.
Бугунги кунда актёр томошабинлар олдида бутунлай бошқача ролда пайдо бўлади: у тобора кўпроқ фожиали, азоб чеккан қаҳрамонларни ўйнамоқда. Ва бу унга мос келадиганга ўхшайди. Танқидчилар актёрнинг ижодини мақташдан тўхтамаяпти.
Гринт поттериандаги иши билан фахрланади, лекин дебют роли билан хайрлашишга тайёр
Ҳозирда Гринт поттериандаги сурат олиш жараёнларини илиқ хотиралар билан эслайди. Шунингдек, у Рон Уизли роли бўлмаганда тақдири қаерга бурилишини ва умуман актёр бўлолармиди, бу ҳақда бир неча бор ўйлаганини айтади.
Рупертнинг фикрича, унинг келажакдаги фаолиятида Гарри Поттер фильмларидан каттароқ картиналар бўлиши даргумон. Шунга қарамай, у франшиза билан хайрлашишга тайёр эканлигини тан олади.
Гринтнинг поттерианнинг ремейк қилиш имконияти ҳақида қандай фикрда эканлиги ҳақидаги саволга у шундай жавоб беради: “Гарри Поттернинг сериалга айланишини истардим. Менимча, бошқа бировга Рон Уизлини ўйнашга рухсат бериш эстафетани узатишга ўхшайди. Мен бу қаҳрамонни асраб-авайлаётгандекман, чунки уни жонлантириш учун мен танланганман. Бу ролни қўйиб юбориш қийин. Аммо ҳаммаси яхши бўлади”.
Изоҳ (0)