Ҳаммамиз болалигимизда севиб томоша қилган “Уйда ёлғиз”, “Стюарт Литтл” ҳамда “Уддабурон болалар” каби фильмларда бош қаҳрамонларни гавдалантирган актёрлар бугун қандай кўринишда эканлиги кўпчиликка қизиқ.
Маколей Калкин — “Уйда ёлғиз”
1990 йилда “Уйда ёлғиз” фильми экран юзини кўради. Картина ижодкорлари фильмнинг бошқа янги рождество фильмларидан кўпроқ муваффақият қозонишини кутмаган эди, лекин тез фурсатда ҳит даражасига кўтарилди. Бош рол ижрочиси Маколей юлдузга айланди ва шундан сўнг, “Менинг қизим”, “Бойвачча Рич” фильмларида ҳам роллар ижро этган. Калкинда Голливудда катта марраларни забт этиш имконияти бор эди. Аммо отаси Маколейнинг гонорар суммасини ошириб юборгани туфайли фильмларга таклиф камайган. Натижада ёш актёр фаолиятини эрта якунлашга мажбур бўлган. Калкин нотўғри қарорлар орқали қийин йўлни босиб ўтди, аммо ҳозир унда ҳаммаси яхши. Маколей Бренда Сонг исмли қизга уйланган ва икки нафар фарзанднинг отасидир.
Анжелика Хьюстон — “Адамслар оиласи”
Анжелика Хьюстоннинг фаолияти 1991 йилда тасвирга олинган “Адамслар оиласи” фильми билан узвий боғлиқ. Картина унга катта шон-шуҳрат келтирган, гарчи у карьерасини фильм премьерасидан 25 йил олдин бошлаган бўлса ҳам. Кўпчилик Анжеликани “Жодугарлар”, “Абадий севги ҳикояси” фильмлари билан ҳам яхши танийди. Шунингдек, у 2019 йилда “Жон Уик” фильмининг учинчи қисмида ҳам суратга тушди.
Жонатан Липниски — “Стюарт Литтл”
“Стюарт Литтл” фильми гапирадиган сичқончани асраб олган кичик оила ҳақида ҳикоя қилади. Ёлғиз фарзанд Жорж укаси бўлишини орзу қилган, лекин асраб олинган “ука” сичқон бўлиб чиқиши билан унинг орзулари пучга чиқади. Аввалига Жорж Стюартни ёқтирмайди, лекин вақт ўтиши билан уларнинг алоқалари яхшиланади.
Фильмда бош ролларни Жонатан Липниски, Жина Дэвис ва Хью Лори ижро этган, Стюарт эса Майкл Жей Фокс томонидан ижро этилган. Жонатан кинокартина суратга олинган пайтда тахминан 8 ёшда бўлган. Ҳозир эса 33 ёшда. 2000 йилларда у фаолиятида бир оз танаффус қилади. Қайтиш эса олдингиси каби муваффақиятли чиқмайди.
Гленн Клоуз — “101 та долматин”
Гленн Клоуз ўзининг узоқ йиллик фаолияти давомида ҳар хил жанрдаги фильмларда суратга тушишга муваффақ бўлган. Лекин ўзини болалар ижодида топди, десак адашмаган бўламиз. Улар орасида ҳаммамиз севиб томоша қилган “Капитан крюк”, “101 та долматин” каби мультфильмлар бор. Гленн “101 та долматин” мултифильмида ёвуз қаҳрамон Круэлла де Вилл ролини ижро этган. Орадан 25 йил ўтиб, Гленн Круэлла де Вилл образини “Круэллла” фильмида ҳам маҳорат билан ижро этди.
Дерил Сабара ва Алекса Вега — “Уддабурон болалар”
2000 йилларнинг бошида “Уддабурон боллар” трилогияси экранга чиқарилган. Унда бош ролларни Дерил Сабара ва Алекса Вега ижро этган. Улар доимий равишда турли оғир жиноий ишларга аралашиб қолган ва ўз ҳаракатлари билан кўп инсонларни қутқарган ака-сингил ролини гавдалантирган. Дерил ва Алекса ҳали ҳам фильм ва сериалларда рол ўйнашда давом этмоқда, аммо узоқ йиллардан бери 2000 йилларнинг бошидаги каби катта ролларга чақирилмаяпти.
Дэниел Редклифф, Эмма Уотсон ва Руперт Гринт — “Гарри Поттер”
Бош рол ижрочиларини танлаш учун фильм ижодкорлари бир ҳафта ичида минглаб болаларни кастингдан ўтказишга тўғри келган. Натижада Дэниел, Эмма ва Руперт танлаб олинган. Фильм режиссёри Крис Коламбус тасодифан “Девид Копперфилд” фильмини томоша қилаётганда Девид ролини ўйнаган ёш йигитчани пайқаб қолади. Суратга олиш жараёни бир неча йилни ташкил этгани учун Дэниелнинг ота-онасини кўндириш ҳам осон кечмаган.
“Гарри Поттер” фильмидан сўнг, Дэниел ўз образидан узоқлашиб, “Преториядан қочиш”, “Мутлақ куч”, “Жунгли”, “Хавфли топшириқ”, ва бошқа кинокартиналарда кутилмаган ва ғайриоддий ролларни ўйнади. Лекин ҳозиргача ҳеч бири “Гарри Поттер”дан ўзиб кетган эмас.
Эмма янги фильмларда унчалик ҳам кўп рол ижро этавермайди, лекин унинг ҳам ижросида бир нечта салмоқли картиналар бор: “Мерлин билан 7 кун ва тун”, “Соҳибжамол ва махлуқ”, “Сфера”, “Кичик аёллар” шулар жумласидан.
Руперт Гринт узоқ вақт давомида кинода ўзини топа олмади, аммо энди у ўз йўналишини телесериалда танлаган кўринади.
Изоҳ (0)