Сеҳргар бола ва сеҳргарлик мактаби ҳақидаги фильмлар тўплами барча томошабинларга манзур бўлган, албатта. Аммо Гарри Поттер ҳақидаги китобларда ҳам, асар асосида ишланган фильмларда ҳам шундай ҳолатлар борки, томошабинда бир қанча саволлар туғилиши аниқ.
Нима учун севги дамламасидан бемалол фойдаланса бўлади?
Фильмда Рон тасодифан Гарри учун мўлжалланган севги дамламасини ичиб юборади. Томошабинлар дамламанинг Ронга таъсир қилганини кўриб, кулиши мумкин. Мантиқсизлик шундаки, деярли шунга ўхшаш таъсир кўрсатувчи — тирик организмни тўлиқ назорат қилиш имконини берадиган Империус жодусини ишлатиш тақиқланган.
Бу ҳолат кинода кўрсатилмаган, лекин китобда бор. Волан-де-Мортнинг онаси ҳар куни эрига севги дамламасини бериб, ундан нафратланмаслиги учун таъсир ўтказган. Натижада кичик Том Реддл, яъни Волан-де-Морт туғилган. Эҳтимол, у севги дамламаси таъсирида туғилгани учун ҳақиқий муҳаббат нима эканини тушунолмайди.
Сеҳрли дунёда тиш шифокорлари борми?
Сеҳргарлар стоматологларга бормайди. Масалан, Гораций Слизнорт ва Гермиона ўртасидаги мулоқотни эслаш мумкин. Слизнорт қиздан ота-онаси нима билан шуғулланишини сўрайди — уларнинг стоматологлар эканлигини билиб, у бу касб хавфли ёки қизиқарли экани ҳақида сўрайди.
Бироқ фильмнинг иккинчи қисмида Уизлилар оиласининг уйидаги соатларни кўриш мумкин. Бу ихтиро оиланинг барча аъзоларининг ҳозир қаердалигини кўрсатади. Томошабинлар бошқа жойлар орасида “дантист” деган жойни ҳам кўришлари мумкин. Демак, сеҳргарлар бу касбни билишади.
Нима учун суякларни қайта ўстириш мумкин, лекин кўриш қобилиятини тиклаб бўлмайди?
Сеҳргарлар дунёсида тиббиёт магл (оддий одамлар)лар дунёсига қараганда анча ривожланган. Хогварц касалхонасидаги Помфри хоним ва Муқаддас Мунго касалхонаси табиблари оддий одамларнинг хаёлига келмаган ишларни қила олади.
Мисол учун, Помфри хоним Гаррининг қўлида осонгина янги суяк ўстиради ва сеҳрли суюқлик ичган Гермионани мушукдан яна одамга айлантира олади. Гренжер тишларини катталаштирадиган тавқи лаънат таъсирига тушиб қолганида ҳам Помфри уларни шундай даволайдики, Гермиона янада жозибали кўринишни бошлайди.
Бундай ишлардан сўнг нега Гарри кўзининг хира кўришига чидаб, кўзойнак тақиб юради? Ундан ташқари қудратли сеҳргар Дамблдор, Артур ва Перси Уизли, Минерва Макгонагалл ҳам кўзойнак тақишади.
Агар сеҳргарлар синган суякларни, даҳшатли яраларни тузата олса, нега оддий астигматизмни даволай олмайди? Магллар эса камида 1980 йилдан бери бу ишни осонгина амалга оширади.
Хогварцга киришдан олдин аслзода болалар қаерда ўқийди?
Ҳогварцга болалар 11 ёшга тўлганда ўқишга киради. Шу вақтга қадар магллар оддий мактабга бориб, бошланғич таълимни ўша ерда олади. Ҳатто чалазотлар ҳам ота-оналари қарши бўлмаса, ўша мактабда ўқишлари мумкин. Аммо тоза қондан бўлган сеҳргарлар ҳақида савол очиқ қолади. Улар, албатта, магллар билан бирга мактабга боришлари мумкин, лекин нега улар магллар дунёсининг оддий нарсаларига шунчалик ҳайрон қолишади?
Бундан ташқари, масалан, Уизли оиласида бўлгани каби уйда таълим олиш имконияти ҳам бор. Аммо бундай ҳолатда ҳам таълим даражаси ҳар бир ўқувчида фарқ қилади. Ҳогварцда одатдаги мактаб фанлари ўқитилмайди, шунинг учун таълим масаласи ҳам савол туғдиради.
Наҳотки Уизлилар шунчалик қашшоқ бўлса?
Фильмларнинг барчасида Уизлиларнинг молиявий аҳволи унчалик яхши эмаслиги доимий равишда таъкидланади. Улар эскирган кийимлар кийиб, ишлатилган дарсликлардан фойдаланишади, жуда камтарона совғалар беришади. Ҳатто Роннинг синган таёқчаси ўрнига янгисини олиб беришолмайди.
Бироқ уларда ҳар доим кўп егулик бўлади, улар бузилган уйни қайта тиклашади ва катта тўй ташкил қилишолади. Албатта, Малфойлар билан таққосласак, фарқ аниқ кўринади. Лекин Уизлиларни ҳам камбағал деб бўлмайди.
Нега Волан-де-Морт тактикасини ўзгартирмайди?
Волан-де-Морт доимо бир хил жодуни қўллаб, асосий рақибини абадий йўқ қилишни истайди. Биринчи марта у чақалоқ билан юзлашади — ҳеч нарса чиқмайди. Кейин яна ўша жодуни қўллайди, яна бирон нарса чиқмайди. Яна бир бор уриниб кўради, лекин яна муваффақиятсизликка учрайди. У шунчалик ақлли бўлса ҳам тактикасини қайта кўриб чиқиш ва муаммони ҳал қилиш учун бошқа йўлни танлаш керак эканини ҳеч қачон тушунмайди.
Нима учун Малфойлар оиласи магллар кийимида юради?
Маълумки, Малфойлар оиласи — аслзода сеҳргарлар бўлиб, ўзларининг келиб чиқиши билан фахрланади ва ўзларидан пастларга юқоридан қарашади. Улар магллар билан ҳеч қандай алоқада бўлишни хоҳламайди, уларга нафрат билан қарашади ва бу нафратни яширмайди.
Бироқ фильмларда Малфойларнинг сеҳрли дунёда бўлсалар ҳам магл кийимларида юрганларини кўриш мумкин. Драко, албатта, ўзининг қора костюмида жуда чиройли кўринади, лекин унинг маглларга бўлган нафрати қаерга кетди?
Изоҳ (0)