Истанбул полицияси махсус операция давомида 3,6 миллион қалбаки еврони мусодара қилди.
Бу ҳақда TRT Haber телеканали маълум қилди.
Телеканал маълумотларига кўра, қалбаки валюта муомаласига қарши кураш бўйича операция шаҳарнинг Европа қисмидаги Фотиҳ ва Зейтинбурну туманларида ўтказилган. Қалбаки пулларни истеъмолга киритишда гумон қилиниб бир киши қўлга олинди.
Кўздан кечириш чоғида муомалага тайёр ҳолатда бўлган қалбаки 3 миллион 600 минг евро купюралар, мойбўёқлар, “100” ёзуви туширилган шаффоф пластик бланкалар, ултрабинафша чироқ, принтер ва 817 дона қалбаки чек варақлари топилди.
Туркия Марказий банки, ўз навбатида, қалбаки валюта муомаласининг олдини олиш бўйича бир қатор чора-тадбирлар кўрганини ва тегишли текширувлар олиб бораётган ҳуқуқни муҳофаза қилувчи органлар билан ҳамкорликда ишлаётганини маълум қилди.
“Қалбаки чет эл валютаси муомаласига йўл қўймаслик мақсадида пулларни санаш воситалари, уларни назорат қилиш ва фойдаланилаётган банкоматлар текширилиб, янгиланмоқда. Марказий банк томонидан адлия органлари билан қалбаки валютага қарши курашиш бўйича ишлар мувофиқлаштирилмоқда”, дейилади регулятор баёнотида.
Аввалроқ Испанияда қалбаки пуллар ишлаб чиқарадиган йирик марказ аниқлангани ҳақида хабар берилганди.
Жиноятчилар асосан 20 ва 50 евролик банкноталарни қалбакилаштирган.
Марказ Андалусия автоном ҳамжамиятидаги Кадис провинциясида жойлашган бўлган. Лаборатория биноси тинтув қилинганда миллий полиция ходимлари у ердан компьютер ва принтер, катрижлар, қоғозлар, кесилган голограмма чизиқлар ва тайёр қалбаки банкноталар, шунингдек, 1500 евролик нақд пул топган.
Изоҳ (0)